Буа делегациясе шәхсән үзе гуманитар ярдәмне сугышчыларына тапшыру өчен махсус хәрби операция зонасына юл тотачак
Буа районы делегациясе шәхсән үзе адреслы гуманитар ярдәмне мобилизацияләнгән буалыларга тапшыру өчен махсус хәрби операция үткәрү зонасына барачак. Һәркем өчен якыннары һәм туганнары кирәкле әйберләрен җибәрә алсын өчен шәхси посылка формалаштырылачак, дип хәбәр итте үз Телеграм-каналында Буа районы башлыгы Ранис Камартдинов.
«Якыннарының, туганнарының район Ветераннар советы базасында Буа, Космовский ур., 31 адресы буенча гуманитар ярдәм җыю пунктына шәхсән мөрәҗәгать итүләрен сорыйбыз. Инициативаны хуплаган һәм мобилизацияләнгән ир-егетләргә көчләреннән килгәнчә ярдәм күрсәткән һәркемгә кабат - кабат рәхмәт әйтәбез», - дип яза Ранис Камартдинов.
Буа районы матбугат хезмәтендә аныкланганча, гуманитар ярдәм җыю пунктында озак вакытлы саклана торган продуктлар, җылылык визорлары, гигиена чаралары, дарулар кабул ителә. Райондашыбыз сәфәр өчен йөк автомобилен бирү инициативасы белән чыкты. Шулай ук районда «мобилизацияләнгән гражданнар өчен» дигән махсус счет эшләвен искәртәбез.
Исегезгә төшерәбез, элегрәк Буа районы делегациясе җыю пунктында, шулай ук Казанда палаткалы шәһәрчектә мобилизацияләнгән, сугышчыларны бөтен кирәк-яраклар белән тәэмин иткән иде. Шулай ук районда республикада беренчеләрдән булып ярдәм итү адреслы чараларын эшләү өчен мобилизацияләнүчеләрнең гаиләләре белән очрашулар башладылар.