Яңгыр ява, сөт кими

Район хуҗалыкларында сөт саву кимеде – сигез ай эчендә ул узган елның шул вакыты белән чагыштырганда 6594 центнерга азрак алынды, ягъни 97 процент тәшкил итте. 

Авыл хуҗалыгы һәм азык-төлек идарәсеннән алынган мәгълүматларга караганда, сөт җитештерүне төп артка сөйрәүчеләр “Вамин-Буа” агрофирмасы һәм “Тинчәле” җәмгыяте. Аларда әлеге күрсәткеч нибары 74-80 процентка, “АгроНур”да 91 процентка тиң булды. Шул ук вакытта “Авангард” агрофирмасында җитештерүне 122, “Тахаръял”да 117 процентка җиткерделәр. Бер сыерга алынган уртача савым 3782 килограмм булды – бу узган елның шушы чорына караганда 13 килограммга кимрәк.

Башка күрсәткечләр дә мактанырлык түгел. Мөгезле эре терлекләрнең баш саны 665кә азаеп, 21787 башка калды. Отчет чорында бозаулар 109га кимрәк алынды, барлыгы 388 баш терлек үлде. Шушы сәбәпләр аркасында да “Вамин-Буа”да абзарлар 733, “Тинчәле”дә 86 башка бушады, ә менә “Тахаръял”да 141, “Авангард”та – 45, “Дружба”да – 37, “Агронур”да 28 башка тулыланды. 

Эре терлекләрдән алынган тәүлеклек уртача үсеш 730, аерым хуҗалыклардан “Авангард”та – 809, “Коммуна”да – 801, “Ямбулат”та 795 грамм булды. “Вамин-Буа” агрофирмасында исә 600 граммга да тулмады.

Әлегә дуңгыз ите җитештерүдә генә уңай тенденция саклана. Сигез ай эчендә ул 2586 центнерга күбрәк, ә сыер ите 648 центнерга азрак әзерләнде. Моңа “Бола”, “Тинчәле”, “Авангард”, “Кыят”,  “Тахаръял”, “Нива”, “Дружба” аеруча зур өлеш керттеләр.

Әлфия ШӘРӘФЕТДИНОВА.

Инсаф СӘМИГУЛЛИН, авыл хуҗалыгы һәм азык-төлек идарәсенең җитештерү-маркетинг бүлеге начальнигы:

- Юеш аяк асты сыерларга да файдага түгел – сөт бирүне киметәләр. Монда алар турында алдан кайгырткан, ягъни 1 сентябрьгә кадәр җәйге лагерьлардан фермаларга кайтарып бетергән хуҗалыклар отышта. Мәсәлән, “Дружба” агрофирмасында “сөтлебикәләр” яңгырлы көннәрне сизми дә диярлек. Биредә сөтне былтыргының шушы вакыты белән чагыштырганда 2,6 тоннага күбрәк җитештерәләр. “Тахаръял”да артым 3 тоннага якын. Юеш көннәрдә дә күрсәткечләр кимүгә түгел, ә үсешкә таба бара. “Авангард”та, “Коммуна”да, “Кыят”та, “Ямбулат”та, “Нива”да да аларның түбән тәгәрәвенә юл куймыйлар. Район буенча исә соңгы 10 көндә савым 3 тоннага азайды. Аның 2 тоннага якыны “Вамин-Буа” өлешендә. “Бола”, “АгроНур”, “Тинчәле” сыерларны фермаларга кайтару белән соңарсалар, “Вамин-Буа”да ашату технологиясе төгәл сакланмый, техника төзек булмау аркасында азык үз вакытында маллар алдына салынмый. Тармак җитәкчеләренең, белгечләрнең урында басылып эшләмәүләре, күп очракта алдап, “күз буяп” йөрүләре дә үзенең тискәре ролен уйный. Муниципаль район башлыгы Азат Айзетуллов ваминлылар белән очрашып сөйләшкәннән һәм ярдәм итү өчен авыл хуҗалыгы идарәсе белгечләрен беркеткәннән соң хәл уңай якка үзгәрә башлады. Дүрт көн эчендә 500 килограмм сөт кире “кайтты”. Бүген барлык хуҗалыкларда да малларны тулысынча кышкы рационга күчерергә, баланслы ашатырга, иртә-кич изеп бирергә, сенаж, силос базларын ачарга, яшел азыкны өстәмә итеп бирергә һәм яхшы һава торышында урамга чыгарып йөртергә кирәк. Һәр 10 көн саен йомгак ясау, ай ахырында эш нәтиҗәләрен анализлау да сөт күләмен арттыруга һәм сыйфатын үстерүгә юл ача.