Фәридә һәм Наил коесы

Килдураздан пенсионерлар Фәридә белән Наил Галиевлар үз акчаларына урам халкы өчен кое казыттылар. Аны ачу тантанасы урам бәйрәме итеп оештырылды.

- Йорт каршыбыздагы иске кое тәмам җимерелгән иде. Бала-чага, терлек-туар егылып төшмәсен, дип котыбыз алынып торды. Ирем белән уйлаштык та, иске коены күмеп, яңасын казытырга уйладык, - ди хуҗабикә. Наил абыйның үз “КамАЗ”ы да бар җитмәсә! Кое өчен сигез данә тимербетон боҗраны җәһәт кенә үзе барып алды, кое казырга Мари-Эл республикасыннан килгән “шабашчы”ларны яллады. Ике көн, дигәндә сигез метр тирәнлектәге кое казылып, боҗраларын да урнаштырдылар.

Уңайлы гына түгел, матур да булсын, дип Наил абый кое өстен бизәкләп тә куйды. 

- Рәхәтен үзебез дә, урамдашлар да күрәбез. Үзебез үлгәч тә рәхмәт әйтерләр, шул җитә безгә, - ди Фәридә. Дөрес, авылның Совет урамында колонка да бар. Әмма әле насосы янып чыгып, әле бүтәнгә сәбәп белән  суы булмыйча тора. Шул чакта кое коткара. Дөрес, чәй суына чишмәгә баралар, әмма коедагысы терлек-туарга, бакчага сибәргә дә менә дигән. 

Ә коены ачкан көн үзе бер кызык иде. Йорт хуҗалары өрәңге, тупыл, юкә агачлары төбенә озын өстәлләр куеп, өстен ризык белән тутырдылар. Урамда яшәүче 25 әби француз яулыкларын бәйләп, бөрмәле күлмәкләрен киеп кунакка килделәр. Остабикә Нурания Сибгатуллина Корьән укыды, вәгазьләр сөйләде. Өйләдән соң көне дә эсселәнеп китте. Фәридәнең киленнәре Чулпан белән Рамилә ике самавырны көчкә кайнатып өлгертеп тордылар. Җиләк-җимеш, камыр ризыкларыннан авыз иткән арада әбиләр күңелле хатирәләрне дә искә төшерделәр. Мәзәк сүз, уен-көлке тынып тормады. Мәктәпкәчә яшьтәге балалар учреждениесе тәрбиячесе Рузинә Насыйбуллина әбиләрне биетте дә, җырлатты да. Ах, ул көн! Халидә апа, Мәдинә апа, Инта шәһәреннән кайтып урнашкан Нәҗибә апа җырлап та күрсәттеләр. Әби-бабайлары янына кунакка кайткан бала-чагага да бәйрәм булды. Ахырдан мәктәп директоры Әлфия Ибләминова гадәти көнне бәйрәмгә әверелдергәннәре өчен Галиевларга барысы исеменнән дә зур рәхмәт белдерде.