Буа муниципаль районы

Техника саклауга куела, төзекләндерелә

2013 елның 28 октябре, дүшәмбе

Техниканы көзен ремонтлауның финанс яктан отышлы, эшләүчеләр өчен җайлы булуы бүген беркемгә дә яңалык түгел. Шуңа да район хуҗалыкларының күпчелеге кыр эшләреннән бушаган тагылма җиһазларны төзекләндерергә өлгерделәр дә инде.
Авыл хуҗалыгы һәм азык-төлек идарәсенең җитештерү-маркетинг бүлегенең механикалаштыру буенча консультанты Рәис Юнысов әйтүенчә, “Дружба” агрофирмасы, “Тахаръял” агрофирмасының “Родина”, “Восход” бүлекчәләре, “Коммуна” җәмгыяте шундыйлардан. “Авангард”та, “Бола”да, “Кыят”та, “Нива”ның “Толымбай” бүлекчәсендә дә ремонт төгәллә-неп килә, калганнарында да эш бара. Сүз уңаеннан, узган атнада техниканы саклауга кую, аларны алда торган язгы кыр эшләренә әзерләү һәм машина-трактор паркларын тәртипкә китерү мәсьәләләре буенча район хуҗалыклары арасында конкурс та оештырылды. ТР Авыл хуҗалыгы һәм азык-төлек министрлыгының агропромышленность комплексын инженер-техник тәэмин итү бүлеге начальнигы Рафыйк Шәкүровтан, авыл хуҗалыгы һәм азык-төлек идарәсе белгечләреннән торган комиссия нәтиҗәләре буенча беренче урынны “Авангард” агрофирмасы яулады. Икенче урынны “Дружба” һәм “Тахаръял” бүлештеләр.
Чәршәмбе көнне “Вамин-Буа” агрофирмасында ремонт барышын үзебез карап кайттык. “Татарстан” бүлекчәсендә безне агрофирманың баш инженеры Рафаэль Фәхретдинов каршы алды, аның белән бергә машина-трактор паркына юнәлдек. Тракторчылар бригадасы бригадиры, техниканың төзеклеген ел әйләнәсе тәэмин итүгә җаваплы Рәүф Юнысов
Слесарь Мансур Каюмов остаханәдә чәчкеч ремонтлау белән мәшгуль иде. Биредә 7 чәчкечнең өчесен, 7 культиваторның дүртесен төзекләндергәннәр инде. Бинада эшләү өчен шартлар тудырылган. Ул мичкә утын ягып җылытыла, эш кораллары, җиһазлар бар. Ә менә алдагы еллар белән чагыштырганда быел запас частьләр белән тыгызрак. Авыл хезмәтчәннәре белән аралашудан шуны аңладым: алар бүген агрофирмада барган үзгәртеп корулар, күчеш чоры кайчан да булса төгәлләнер һәм барысы да җайга салыныр дигән өмет белән яшиләр. Үзләренә йөклән-гән хезмәтне җиренә җиткереп башкару, эшне бер минутка да туктатмау җаен табалар.
Аннары “Гигант” бүлекчәсендә булдык. Монда тө-зекләндерүне шулай ук сентябрь ахырында башлап җибәргәннәр. Тизлек монда да теләгәнчә түгел. Әмма төшенкелеккә бирелмиләр. Әнә, Александр Храмов, Геннадий Прокофьев төзекләндерелергә тиешле 7 культиваторның икенчесен, Иван Топоркин, Виктор Чубуков 13 чәчкечнең өченчесен сафка бастырып киләләр. Эретеп ябыштыручы Сергей Антонов та алар янында. Тырмалар тимерче Евгений Сапожниковта
- Көненә өч тырманы әзерлек сызыгына куя. 183 тырманың җитмешен ремонтлады инде. Эшен белеп, зур җаваплылык белән башкара, сыйфатка тел-теш тидерерлек түгел, - ди тәҗрибәле тимерче турында остаханә мөдире Сергей Харитонов. “Гигант” бүлекчәсе инженеры Илһам Гомәров, агроном Владимир Чашкин ремонтчылар янында даими булып, эш барышын контрольдә тоталар, киңәшләре белән ярдәм итәләр.
Рафаэль Фәхретдинов әйтүенчә, агрофирманың “Волга” бүлекчәсендә дә техниканы саклауга куйганнар, төзекләндерүне башлап җибәргәннәр.

БАРЛЫК ЯҢАЛЫКЛАРНЫ УКУ