Тәлгатькә 60 тулган булыр иде

Карл Маркс исемендәге колхоз рәисе булып торган, бүгенге көндә мәрхүм Тәлгать Фәттаховны искә алу кичәсе узды Янтуганда.

Исән булса, Татарстанның атказанган авыл хуҗалыгы хезмәткәре шушы көннәрдә 60 яшьлек юбилеен шулай зурлап уздырган булыр иде. Аяусыз үлем аны  арабыздан бик иртә алып китте. 

Кичә героен бер минут тынлык белән искә алудан башланды. Сәхнәгә күтәрелүчеләрнең чыгышлары кыска булды: якын дусларның истәлекләре  хатирәләр белән сугарылган. Үз вакытында мәрхүм белән  иңгә-иң хезмәт куйган муниципаль район башлыгы Азат Айзетуллов  аның җитди дә, тапкыр да булуын, уен-көлке дә яратуын искә алды:

- Карл Маркс исемендәге колхоз дигәч, күз алдына Тәлгать  килеп баса. Без  аннан күп нәрсәгә өйрәндек. Аның белән республика җитәкчеләре дә исәпләште, - диде ул.  Колхоз рәисе авылда тузган электр баганаларын яңарттырган, күпләргә йорт-җир коруда ярдәм иткән.  Мәктәпнең җылылык системасын яңартуда колхоз кассасыннан акча биргән.  Хуҗалык бу елларда ашлык, ит, сөт җитештерүдә районда  алда бара. 

Тәлгать Фәттаховның чордашы, сабакташы ветеринария табибы Фәрит Закиров  та истәлекләре белән бүлеште:

- Укый-укый эшләгәч, авылга еш кайта алмый иде. Әтисе иртә үлгәч әнисе Мөгаззәмәгә, апаларына, энесенә һәрдаим ярдәм итеп яшәде, - диде ул. Район  башкарма комитеты җитәкчесе Сәлим Даутов исә авылдашының эшләгән кешенең кадерен белүе турында  мисаллар китереп сөйләде, олы җанлы, киң күңелле кеше турында  бер кичтә генә сөйләп бетерерлек түгел, диде. 

43 ел тракторчы булып эшләгән Инсаф Сәлахов чыгышы да хатирәләргә бай иде:

- Тәлгать эчкечелеккә бирелүчеләрнең байтагын дөрес юлга бастырды, тормышның матурлыгын күрергә өйрәтте. Төпле киңәшләре өчен аңа рәхмәтле булучылар бихисап,- диде.  Инсаф рәиснең истәлеген саклау йөзеннән Янтуганның Болын урамын Тәлгать Фәттахов урамы дип атарга тәкъдим итте.  Тәлгатьнең яхшылыкларын истә тотучылар  тагын да бар. Назыймә Хәйретдинова каты авырып киткән кызы Рузиләне ашыгыч рәвештә  республика клиникасына озатырга булышкан, аңа исән калырга ярдәм иткән рәискә рәхмәтен, күңеле тулудан, сәхнәгә менеп әйтә дә алмады. Рәхмәт йөзеннән чәчәк бәйләмен Тәлгатьнең хатыны Әлфиягә тапшырды. 

Җыелган халык мәрхүмнең хатыны Әлфияне, уллары Ирек, Илнур, Илшатны алкышлап каршы алды. Әлфия ире турында җылы  хатирәләр белән  уртаклашты.

- Тәлгать балаларны да кече яшьтән хезмәткә өйрәтте. Улларыбыз комбайн ремонтлаучы, комбайнчы ярдәмчесе булып эшләү өчен имтиханнарын вакытыннан алда тапшырып кайталар иде.  Кеше гозерен бервакытта да аяк астына салмады, хәленнән килгәнчә  ярдәм  итәргә омтылды, - диде. Ул да, уллары, Тәлгатьнең бертуган энесе Шәүкәт кичәне оештыруда ярдәм иткән һәркемгә рәхмәт белдерделәр. 

Истәлекләр уртаклашу концерт номерлары белән аралаштырылып барылды. Тамашачылар Казан бию ансамбле,  башкаладан килгән  җырчылар чыгышларын алкышларга күмделәр.