Татарстанда апрель аенда җир кишәрлекләренә ихтыяҗ артты

Татарстан Росреестры агымдагы елның апрель аенда алынган исәп-хисап-теркәү гамәлләре йомгаклары буенча түбәндәге мәгълүматларны китерә.

Шулай итеп, ведомство мәгълүматы буенча, апрельдә сату-алу килешүләре нигезендә 12 787 хокук күчеше теркәлгән, бу март белән чагыштырганда 6,2% ка күбрәк (12 045).

Күчемсез милек объектлары төрләре буенча бер ай эчендә иң күбе - 10% ка – җир кишәрлекләренә ихтыяҗ арткан – мартта 6 232 дән апрельдә 6 878 гә кадәр. Фатирларга һәм шәхси торак йортларга ихтыяҗ 2-3% ка арткан.  Сату-алу шартнамәләре нигезендә торак урыннарга карата 4 258 хокук күчеше теркәлгән, шәхси йортларга карата – 983. 2025 ел башыннан Татарстан Росреестры тарафыннан барлыгы 46 790 килешү теркәлгән.

«Апрель нәтиҗәләре буенча күчемсез милекнең икенчел базарында тотрыклылык турында сөйләргә мөмкин. Объектларның барлык төрләре буенча ихтыяҗ динамикасы уңай, ләкин уртача –  6% тан бераз күбрәк. Сорауның максималь үсеше - 10% - җир кишәрлекләренә күзәтелде. Шуңа бәйле рәвештә, быелның 1 мартыннан җир кишәрлекләре белән төгәл чикләр билгеләнмичә килешүләр төзүне тыю турында искәртәсем килә. Әлеге чара закон нигезендә күчемсез милек ияләренең милек хокукын яклау һәм аларны җир бәхәсләреннән арындыру өчен кертелгән», - дип шәрехләде Татарстан Росреестры җитәкчесе урынбасары Лилия Борһанова.