Татарстан Росреестры җир кишәрлеген ызанлаганда  үз паспорт мәгълүматларыңны бирергә кирәкме икәнлеген аңлатты.

Миңа дачадагы күршеләр шалтырата. Алар ызанлау ясыйлар һәм безнең паспорт мәгълүматларын һәм бездән кайдадыр имза куярга сорыйлар. Минем соравым бар: чынлыкта мин үземнең паспорт мәгълүматларын бирергә һәм кайда икәнен аңламыйча имза куярга тиешмени? Алар миңа ызанлау планын күрсәтергә тиеш түгелмени?

2 нче күчемсез милеккә хокукларны дәүләт кадастр исәбенә алу һәм дәүләт теркәве бүлеге башлыгы Ләйлә Шәйхетдинова җавап бирә:

-Кадастр турындагы закон нигезендә (24.07.2007 елгы 221-ФЗ) җир кишәрлеге чикләренә кагылышлы хаталарны төзәтү чикләрен төгәлләштергәндә килештерү акты төзелә, аңа хокук иясенең паспорт мәгълүматлары кертелә. Документ, димәк, шулай ук хокук иясе тарафыннан имзалана, бу мәҗбүри шарт булып тора.

Җир кишәрлеге хуҗасы ызанлау планын әзерләүне сорап кадастр инженерына мөрәҗәгать итә. Белгеч эшләрне башкара һәм документ төзи, аннары килештерү өчен чиктәш җирләрнең хуҗаларына мөрәҗәгать итә. Бу вакытта чиктәш җир кишәрлеге хуҗасының үзе белән шәхес идентификаторы (паспорт), шулай ук, әгәр күрше кишәрлек хуҗасы исеменнән вәкаләтле вәкил эш итсә, ышанычнамәсе булырга тиеш.

Паспортны кадастр инженерына күрсәтәләр. Белгеч килгән затның вәкаләтләрен тикшерергә, танышу өчен ызанлау  планын күрсәтергә, җентекләп аңлатырга тиеш, ә кирәк булганда - урында чикләрнең урнашу урынын күрсәтергә.