Гриппка каршы вакцинация.
- Гриппка каршы вакцинациянең төп максаты-кешеләрне инфекциянең массакүләм таралуыннан булдырмау. Грипп еш кына шактый авыр уза һәм еш кына югары һәм түбән сулыш юлларында икенчел бактериаль инфекцияләр үсеше, башка органнар һәм системалар зарарлануы белән бәйле төрле өзлегүләр китереп чыгара. Хәвеф-хәтәр төркеменә өлкән яшьтәге кешеләр, биш яшькә кадәрге балалар (бигрәк тә ОРВИ белән еш авыручылар), хроник авырулар (йөрәк-кан тамырлары, бронхо-үпкә, шикәр чире, симерү, бөер, бавыр авырулары һ.б.) булган затлар, шулай ук йөкле хатын-кызлар керә. Шуны истә тотарга кирәк: грипп вирусы бик тиз тарала. Прививка ясатып, Сез үзегезнең дә, якыннарыгызның да сәламәтлеген саклыйсыз. Бигрәк тә аларның берәрсенең теге яки бу сәбәпләр аркасында вакцинациягә каршы күрсәтмәләре булса. Ул чагында андый кешеләрнең авыру куркынычы сизелерлек кими. Вакцинацияләнгән халык вируска таралырга ирек бирми - нәкъ менә шуның өчен коллектив иммунитет барлыкка килә дә инде.
- Вакцинациягә каршы күрсәтмәләр һәр вакцина препаратының инструкциясендә күрсәтелгән. Мәсәлән, тавык аксымына аллергия шундый каршы күрсәтмә булырга мөмкин. Шулай ук ОРВИ һәм башка авырулар кискен барган вакытта, хроник авырулар кискенләшкәндә прививка ясатырга ярамый. Бу очракта прививканы тулысынча савыкканчы калдыру яхшырак. Вакцинация алдыннан табиб белән киңәшләшергә кирәк.
- Прививка ясатканнан соң грипп йоктыру куркынычы кала, ләкин сизелерлек кими. Уртача алганда прививка 80-90% саклауны тәэмин итә һәм авыруның авыр барышын һәм үлем очракларын тулысынча диярлек булдырмый кала.