Тимер юлда һәлакәт полиция җинаятьчеләрне эзли

Шәһәрдә чак кына зур фаҗига булмыйча калды – 19 ноябрьгә каршы төндә Ульяновск шәһәреннән килүче товар поезды Казан-Буа тимер юлының 109 километрында рельслар өстенә билгесез затлар куйган тимер-бетон блокка бәрелде.

Ярый әле поезд белән идарә итүче машинист әлеге каршылыкны ерактан ук күреп алып экстрен тормозга сала. Тик тулы вагоннар таккан поезд тиз генә туктый алмый һәм блокны берничә метрга кырыйга “очыра”. Поезд, зыян күргән локомотивны башкасына алыштыргач, юлын дәвам итә. 

Мондый хәлне кемнеңдер акылсызлыгы дими ни дисең. Күз алдына китерегез, төрле йөк төягән вагоннар ауган булса, шәһәргә, җиргә, кешеләргә, экологиягә нинди зур зыян килгән, күпме матди байлык югалган булыр иде. Ә иң куркынычы – аннан ерак та түгел газ тутыру станциясе урнашкан.

Буа ОВДсыннан алынган мәгълүматларга караганда,  Комаров урамы артында яңа юл төзелгәч, Татар Буасы авылы юнәлешен-дәге “переезд” ябылачак. Моны РФ Транспорт министрлыгы таләп итә. Норматив нигезендә тоннель тибындагы юлүткәргечнең ике ягыннан 5 километр радиуста көйләнмәүче тимер юлны аркылы чыгу урыннары булырга тиеш түгел. Ә бездә мондый юлүткәргеч шәһәрнең Вахитов урамында төзелде. Ә Гагарин урамыннан Көнбатыш бистәгә чыга торган автомобиль юлы быел җәен ябылды. Бүген әлеге “переезд”га аркылы куелган төзелеш блокларын алдылар, алар урынына чокыр казыдылар.