Буа муниципаль районы

Яшь буын геройларны сәламләде

2013 елның 12 декабре, пәнҗешәмбе

ТР РОГО (ДОСААФ)ның Буа җирле оешмасы Ватан геройлары көненә багышлап район уку йортларында укучылар арасында төрле спорт уеннары үткәрде.
Катнашучылар бәйгенең тантаналы өлешенә район мәдәният сараена җыелды. Район башкарма комитеты җитәкчесе Сәлим Даутов бәйрәм белән тәбрикләгәннән соң бу көннең үзенчәлегенә тукталды, геройларның батырлыгы яшь буынга патриотик тәрбия өлгесе булып торуын ассызыклады. Район хәрби комиссары урынбасары Рамил Җамалетдинов районда геройларыбыз сафының сирәгәя баруын, шуңа алар белән исән чакта мөмкин кадәр күбрәк очрашулар оештырырга, игътибар күрсәтергә чакырды. Шәһәрдән Бөек Ватан сугышы ветераны Гариф Сафиуллин да сүз алып яшьләрнең тыныч тормыш геройлары булуларын, үз Ватаннарының чын патриоты булып үсеп җитүләрен теләде.
Аннан районның барлык мәктәпләреннән, шәһәрнең башка уку йортларыннан җыелган 24 команда вәкилләре төрле ярышларга таралыштылар. Иң элек тирга юл алдылар. Пневматик мылтыктан атуда егетләр арасында иң күп очконы Яңа Чәчкаптан Алмаз Әхмәтов җыйды. Ә кызлар арасында беренчелек Иске Тинчәле урта мәктәбе укучысы Гүзәл Гыйльмановада. Командалар арасында Иске Тинчәле мәктәбе – беренче, медучилище – икенче, Аксу урта мәктәбе өченче урында. Калашников автоматын сүтеп-җыю бәйгесендә Р. Сәгъдиев исемендәге урта мәктәптән Никита Ильин 26.35 секунд вакыт белән “рекорд” куйды. 5 номерлы мәктәптән Павел Попов белән Алшихтан Никита Григорьев анардан 3-4 секундка гына калыштылар. Аннан көч күнегүләре старт алды. Турникта тартылуда 1 номерлы мәктәп укучысы Иван Кузнецов 29 тапкыр тартылып, иң нык беләкле булуын дәлилләде. Р. Сәгъдиев исемендәге мәктәп укучысы Никита Ильин – икенче, Алшихтан Никита Григорьев өченче урын алдылар. Кызлар да сынатмады. “Отжимание”дә гәүдәсен 30 тапкыр күтәреп Янтуганнан Язилә Баһаветдинова беренчелекне яулады. Әлшидән Наталья Гордеева белән Иске Суыксу урта мәктәбеннән Розалия Акшева икенче-өченче булдылар. Егет-кызлар үзләрен юл йөрү кагыйдәләрен белүдә, автомобиль йөртүдә дә сынадылар. Шәһәрнең лицей-интернат командасы аларда иң белемле һәм иң остасы булуын күрсәтте. Яңа Чәчкап урта мәктәбе укучылары, ветеринария техникумы студентлары да төшеп калганнардан түгел. Барлык нәтиҗәләр буенча Р. Сәгъдиев исемендәге мәктәп командасы җиңде. Яңа Чәчкаплылар пьедесталның икенче, Янтуган командасы өченче баскычка күтәрелделәр.
Оешманың хәрби дәресләр укытучысы, бәйгенең баш хөкемдары Рафыйк Шәрәфетдинов мондый уеннар район күләмендә әле беренче тапкыр гына үткәрелүгә карамастан өлкән сыйныф укучыларның зур әзерлектә килүләрен әйтеп, егетләргә алда торган армия хезмәтендә сынатмауларын теләде һәм җиңүчеләргә кубоклар белән бергә Мактау грамоталары, кыйммәтле бүләкләр тапшырды.

Оценить материал и/или оставить мнение

БАРЛЫК ЯҢАЛЫКЛАРНЫ УКУ