Буа муниципаль районы

Әтисе васыятен үтәде

2013 елның 19 декабре, пәнҗешәмбе

Тәҗрибәле шәфкать туташы булып ирешсә дә Венера Кукушкинаны табиб булу уе ташламады.
Буа медицина училищесында бары бер ел гына укыган иде, әтисе Фәйзерахман каты авырып китте.
- Кызым, син аякка бастырсаң гына инде, - дип өмет тулы күзләре белән кызына карый иде ата. Тик Венера иң якын кешесенә берничек тә булыша алмады. Әтисе аңа табиб булырга васыять әйтеп калдырды.
Ләкин әтисе гозерен тиз генә үти алмады, акчасызлык чабудан тартты. Гаиләдә барысы 7 бала, Венера берсеннән-берсе кечкенә дүрт эне-сеңелләрен аякка бастыруда әнисенең уң кулы. Медучилище тәмамлагач Иске Суыксу фельдшерлык-акушерлык пунктына мөдир итеп билгеләнде. Өч меңнән күбрәк кеше яшәгән авылда медпунктта кәгазь эшләре бөтенләй ташландык хәлдә була. Иң беренче итеп исәп медицина эшчәнлеген яңабаштан төзи ул. Балалар исемлеген барлап, прививка ясау системасын тәртипкә сала. Әкренләп нәниләрне трахома авыруыннан дәвалауга ирешә. Ул вакытта медпункт каршында колхозның бала тудыру йорты да була. Бернинди уңайлыклар юк. Бина утын ягып җылытыла, суны урамнан ташыйсы. Шундый хәлдә дә сынатмый ул. Бала табучылар да, авыр хәлдә дәваланучылар да аның карамагында савыгып аякка баса.
Дүрт елдан соң хыялын тормышка ашырырга уйлый. Тик дәваханә җитәкчелеге яхшы белгечне югалтырга теләми. Ул документлар кабул итүнең соңгы көнендә Казанга барып, укырга керергә гариза бирергә өлгерә. Имтиханнарын тапшырганнан соң Казан дәүләт медицина университетыннан чакыру кәгазе килгәч, дәваханәгә барып эшен тапшыра. Җитәкчелекнең яшь студентка уңышлар теләүдән башка чарасы калмый.
Дипломлы белгечкә берничә урында эш тәкъдим итәләр. Ул гаиләсе белән Буага кайта – әтисе васыятен үтәргә. Озакламый гаилә тораклы да була. Венера Фәйзрахмановнага бер үк вакытта невропатолог, психиатр, нарколог вазифалары йөкләнә. Көнгә утызар авыру кабул итәргә, ятып дәваланучылар янында да булырга, чакыру буенча барырга өлгерергә туры килсә дә, ул зарланмый. Ә иң авыр вакытлары психиатр вазифасында эшләгәндә була. Психик яктан сәламәт булмаганнарны кабул иткәндә махсус ярдәм чакыру төймәсе булмаганлыктан, кыен хәлләрдә калырга туры килгән чаклар да була.
Табиб хезмәтенең беренче көннәреннән үк коллегаларының ярдәмен тоеп эшли. Нил Фәйзетдиновны, Үзбәк Гайнуллинны, Зәйнәп Фоминаны, Валентина Сторожеваны, үз кул астында эшләгән беренче шәфкать туташы Антонина Красильникованы бүген дә иң җылы хисләр белән искә ала ул. Венера Фәйзрахмановна һәрвакыт яңалыклар белән бергә атлады, белемен үстерде, аларны эш тәҗрибәсендә кулланды. Озак еллар эшләү дәверендә аның алыштыргысыз белгеч булуын исәпкә алып, медицина социаль экспертизасы бюросы эксперты-невропатологы итеп билгеләделәр. Ул бүген неврология, психиатрия һәм наркология өлкәсендә югары класслы белгеч исемен йөртә.
Венера Фәйзрахман кызы Бариева хезмәтендә генә түгел, гаиләсендә дә үрнәк булды. Алар Гомәр Һади улы белән 1 кыз 2 ир бала тәрбияләп үстерделәр. Аларга югары белем биреп олы тормыш юлына чыгардылар. Балалары да бүгенге көндә табиб һөнәрен сайлап, әниләре юлын дәвам иттеләр.

Оценить материал и/или оставить мнение

БАРЛЫК ЯҢАЛЫКЛАРНЫ УКУ