Буа муниципаль районы

Гаиләдә яшәргә ...мәктәптә өйрәтәләр

2013 елның 23 декабре, дүшәмбе

Кызганыч, туганнар, дуслар түгәрәгендә, фанфарлар, затлы табын, бокаллар зеңләве белән башланган парлы тормыш еш кына, көнкүреш “айсбергларына” бәрелеп, бер мизгелдә челпәрәмә килә. Мәсәлән, быел гына да районда 332 пар законлы язылышкан, 124 пар аерылышкан.
Россия аерылышучылар саны буенча лидер. Бу “данлыклы” дүртлеккә тагын Белоруссия, Украина, Молдова керә. Америка алтынчы урында. Татарстанда өч өйләнешүчегә бер аерылышу туры килә. Дәүләт бу тискәре күренешкә карата төрле чаралар күрә. Хәтта аерылышучыларга дәүләт пошлинасын 30 мең сумга кадәр җиткерү фаразы да каралды. Ләкин аерым яшәргә карар кылган парларны бу гына туктата алмаячагы көн кебек ачык. Гаиләләрне саклаучы, ныгытучы башка, акыллырак алым кирәк иде. Һәм быелдан башлап гаиләдә яшәргә өйрәтүне мәктәптә укыта башладылар. 2012-013 уку елында республиканың күпчелек мәктәпләрендә өлкән сыйныфлар өчен “Гаилә тормышы нигезләре” дигән яңа фән укытыла башлады. Безнең районда ул әлегә шәһәрнең 5 номерлы мәктәбендә гамәлгә кертелде. Электив курслар рәвешендә. Киләсе уку елыннан ул барлык урта уку йортларында да укытыла башлаячак.

Рәисә Нуруллаева, 5 номерлы мәктәп укытучысы:
- Курсның максаты – өлкән сыйныф укучыларын ир белән хатынның гаиләдәге ролен күзалларга, мавыгу белән чын йөрәктән яратуны аерырга өйрәтү һәм никахкача якын мөнәсәбәтләргә карата тискәре караш формалаштыру. Яшь кешене гаилә коруга психологик яктан әзерләү бик мөһим: алар бала тәрбияләү, тормыш алып бару белән бәйле кыенлыкларны алдан ук белеп торырга тиешләр. Тормыш бал-майдан гына тормый. Үзара аңлашылмаучанлыклар, конфликтлар да булачак. Менә шул проблемаларны бер-береңне рәнҗетмичә уртага салып сөйләшү, уртак фикергә килә белү кирәк. Гаилә мөнәсәбәтләре психологиясен мәктәптә өйрәнү киләчәктә аерылырга теләүчеләр санын киметер дип ышанам.
Гөлназ Хәкимова, район ЗАГС бүлеге начальнигы:
– Статистика Балтач, Актаныш районнарында аерылучылар саны азрак булуны күрсәтә. Ә Казан, Яр Чаллы, Түбән Кама шәһәрләрендәге мәгълүматларда уртача өч өйләнешүчегә бер аерылышу туры килә. Быел бездә дә аерылышучылар саны хәйран күп. Россиядә аерылышу өчен дәүләт пошлинасын 30 мең сумга җиткерү тәкъдимен тикшерү дә өлеш кертте моңа. Янәсе, кыйммәтләнгәнче аерылуны рәсмиләштереп калырга кирәк.
Аерылулар күбәюнең сәбәпләре төрле. Моннан 20 еллар элек телевидениедә “Мин үзем” тапшыруы барды. Анда феминизм пропагандаланды, ягъни хатын-кызның ирләрне санга сукмыйча тормышны үзе генә алып баруы хупланды. “Санта-Барбара” кебек сериаллар да гаилә таркалуга җиңелрәк карарга өйрәтте. Хәзер читкә акча эшләргә чыгып китүләр еш күзәтелә. Ир белән хатынның аерым торуы да гаиләне какшата. Аерылышучылар арасында 35-40 ел бергә яшәүчеләр дә бар. Кайберәүләр кинәт бер-берсенең моңарчы күзгә ташланмаган кимчелекләрен күрә башлыйлар, картаеп барган бабайларның, гаиләсен ташлап яшь хатын янына күчеп киткән очраклар да шактый.
Аерылышуларны булдырмау юнәлешендә актив эш алып бара. Яшьләргә үрнәк өчен 50-60 ел бергә тату гомер кичерүчеләрнең юбилейларын үткәрәбез, язылышу тантанасына төрле уку йортларында белем алучыларны чакырабыз, алар белән ныклы гаилә кору максатында әңгәмәләр оештырабыз. Яңа елдан хәтта бу мәсьәләдә мәктәпкәчә яшьтәге балалар учреждениеләренә кадәр барып җитеп, район мәгариф идарәсе белән берлектә “Әни” бәйрәме, “Әти, әни, мин – бәхетле гаилә” кичәсе, рәсем конкурслары үткәрергә дә исәплибез.

Оценить материал и/или оставить мнение

БАРЛЫК ЯҢАЛЫКЛАРНЫ УКУ