Буа муниципаль районы

Погонлы кыш бабай килде

2013 елның 31 декабре, сишәмбе

Күңелле факт – быел полиция Кыш бабаен җыештырылган, ашлы-сулы өйләрдә, сөенеп каршы алдылар. Берничә елдан бирле әлеге “бабай” бәйрәм алдыннан берничә “миссия” башкара – “авыр”, полициянең балигъ булмаганнар эшләре буенча бүлегендә исәптә торучы балаларга Яңа ел бүләкләре өләшә, берочтан андагы тәртипкә дә күз сала.
“Газель” салонына шыплап тутырылган тәм-томнар төяп сәфәр шәһәрдә яшәүче гаиләләргә барудан башланды. Балигъ булмаганнар эшләре буенча инспектор Денис Мостяков, Кар Кызы – “Гармония” социаль хезмәт күрсәтү үзәгенең социаль педагогы Гүзәл Әюпова беренче ишек шакыган өйдә сигез яшьлек бала аларны өзелеп көткән күрәсең. Әнисе ашыга-ашыга кызчыгына бәйрәм күлмәген кигезде, кулына күчтәнәч пакетны да тоттыргач, сабыйның түбәсе күккә тиде. Кыш бабайга шигырь да сөйләп бирде.
Күп балалы әти исә кунакларны урамга ук чыгып каршы алды. Бу өйдә аның белән өч бала яши. Карнавалга кебек киенгән балалар баштан тартынып торсалар да, бүләкләр өләшкәч кыюландылар, фотога да төштеләр.
Аннары Яңа ел экипажы авылларга юл алды. Зур Фроловода яшәүче күп балалы гаиләдә быел аеруча бәйрәм – берничә ел эчүчелек белән шөгыльләнгән әни төзәлгән, балаларының күзгә күренеп үзгәрүенә үзе дә сөенә. Әнә алар Кыш бабай белән Кар Кызын ерактан ук күреп алып, чаба-чаба өйгә кайттылар.
Кыскасы, Кыш бабай һәм Кар кызы визиты булган бер өйдә дә кәеф төшәрлек сәбәп табылмады. Кыш бабай Яңа ел алды сәяхәтеннән соң шундый рапорт бирде: гаиләдә булдылар, балаларны сөендерделәр, гадәттән тыш хәлләргә юлыкмадылар.

Оценить материал и/или оставить мнение

БАРЛЫК ЯҢАЛЫКЛАРНЫ УКУ