Геройларны искә алдылар

Календарьда 4 февраль   Буа тарихына мәңгелек “кара” дата булып кереп калды.
Быел да бу көнне район полиция хезмәткәрләре коллегаларын – моннан 12 ел элек дезертирлар кулыннан һәлак булган геройларны искә алдылар.
Шәһәрнең үзәк мәйданында узган митингка халык күп килгән иде.
Аны ачып, муниципаль район башлыгы Азат Айзетуллов:
- Яхшы хәтерлим мин ул салкын, шомлы көнне. Батыр егетләребезне шушы мәйданнан  соңга юлга озаттык. Югалту ачысы уртак иде. Шуннан бирле берни үзгәрмәде кебек. Дистә елдан күбрәк вакыт узса да, йөрәк һаман әрни. Әлбәттә, безнең хәсрәт мәрхүмнәрнең газизләренекенә караганда берни түгел. Шуңа да мин аларга чиксез сабырлык телим һәм геройларның ата-аналары, якыннары алдында баш иям, - диде ул.
Аңардан соң чыгыш ясаган район полиция бүлеге начальнигы Айрат Ханбиков та коллегаларын зур хөрмәт белән искә алды. Аннан барча халыкның игътибары мәйданның бер ягында тезелеп утырган геройларның якыннарына юнәлде. Күбесе елый,  ә кайберләре тирән хәтирәләргә чумган. Кече лейтенант Шамил Абдрахмановның әнисе Фәһимә апа  улының исән чагындагы хатирәләрне барлады, аңа багышланган шигырен сөйләде.
- Рәхмәт сезгә, Шамилемне онытмыйсыз, - диде ул ахырдан күз яшьләренә буылып.
...Берничә минуттан һавада  ату залпы яңгырады. Барысы да батыр райондашларыбыз истәлегенә куелган һәйкәлгә чәчәкләр салдылар.