Буа районы “Уңайлы мохит” программасын тормышка ашыруны дәвам итә

Быел исә биредә район үзәк хастаханәсен инвалидлар өчен җайлаштыруга зур игътибар бирергә уйлыйлар.

- Бүгенге көндә районыбызда 5 меңнән артык инвалид исәпләнә. Быел аларны уңайлы мохит белән тәэмин итүгә республика бюджетыннан 15,5 миллион сум акча бүлеп бирелде. Әлеге акчаларның 4 миллион сумнан артыгы район хастаханәсен мөмкинлекләре чикле кешеләр өчен җайлаштыруга тотылачак. Инвалидларны эш белән тәэмин итү һәм Буа картлар йортында әлеге категория ватандашлар өчен шартлар булдыруга да шактый күләмдә финанс ярдәме каралган, - дип сөйләде безгә Буа районының социаль яклау бүлеге җитәкчесе Ләйлә Камалова.

Аның сүзләренә караганда, Буада гомер итүче инвалидларны уңайлы мохит белән өлешчә тәэмин итү инде тәмамланган. Хәзер исә аларның имин һәм уңайлы хәрәкәте өчен тиешле барлык шартларны булдыру эшчәнлеге башланып киткән. Бу эшләрнең барысы да инвалидлар үзләрен җәмгыятьнең тулы хокуклы вәкилләре итеп хис итсен өчен эшләнә.

Айрат Шәфигуллин исә халыкның инвалидларга дөрес мөнәсәбәт күрсәтә белмәвен аеруча мөһим проблемалар рәтенә куя. Аның сүзләренә караганда, күпләр шәһәр һәм район инфраструктурасын мөмкинлекләре чикле кешеләр өчен җайлаштыруның ни дәрәҗәдә мөһим булуын аңламый. Нәкъ менә шуңа күрә киләсе елларга исәпләнгән “Уңайлы мохит” программасына инвалидларга карата җәмгыять фикерен үзгәртү белән бәйле бүлекләр дә өстәлгән.