Туган җире җибәрмәде

Кечкенәдән колхозда төрле эшләрдә катнашып, авырлыкларны үз җилкәсендә татып үскән егет киләчәген җир эше белән бәйләячәген белә иде. Тик язмышы аны җитештерүнең төрле тармакларында сынады, ә ул  һәркайда макталып килде.
Зөфәр Садыйков Кырык Садак авылында тату һәм ишле гаиләдә җиденче бала булып туды.  Әтиләре  Фатыйх абый гомере ике  улын да үзе белгән бөтен нәрсәгә өйрәтте. Ир кешегә җитмеш төрле һөнәр дә аз дия иде, мәрхүм. Моның чыннан да шулай икәнлеген Зөфәр еллар узган саен күбрәк аңлады. Мәктәпне тәмамлаганнан  соң ике дә уйламыйча “Заря” колхозында слесарь булып эшли башлый. Озакламый аны армия хезмәтенә алалар. Хәрби бурычын үтәп  кайткач,  колхоз җитәкчелеге аның эшкә сәләтен күреп,  комплекслы бригада бригадиры итеп билгели. Шул вакытта әтисенең ныклы таянычын тоя ул, аның акыллы киңәшләре теләсә нинди авырлыкларны җиңәргә дә этәргеч була. Колхозның данын тагын да күтәрү өчен   аңлашып эшләү генә аз булуын аңлап,  югары уку йортын тәмамлый,  агроном белгечлеге ала. Дипломлы белгечне эшкә берничә җиргә чакырп торсалар да, туган җирен ташламый. Буа шикәр заводының чимал бүлегенә агроном-инспектор булып кайта, аннан аны элеватор җитәкчесе, бүгенге көндә мәрхүм Ислам Сафин директор урынбасары итеп чакыра. 7 ел аңлашып эшлиләр алар. Акыллы җитәкче яшь белгечне күп нәргәгә өйрәтә, моның өчен аңа әле дә мең рәхмәтле Зөфәр абый.
Менә ул кабат туган авылында – 32 яшьлек Зөфәр Фатыйховичны, күптәнге хыялын тормышка ашырып, колхоз рәисе итеп билгелиләр. Тик хуҗалыкның гына гөрләп торган заманнары узган. Дәүләт  бернинди ярдәм күрсәтми, техника базасын яңартып тормагач, алары да еш чыгымчылый. Шулай да зарялылар язгы чәчүне тәмамлау турында ел саен беренчеләрән булып рапорт бирәләр, бөртеклеләрдән дә моңарчы күрелмәгән уңыш җыеп, дәүләткә тапшыралар. Барысы да үз урынына басты, дигәндә генә тагын яңа вазыйфага – инде бөтенләй башка өлкәгә күчерәләр.  Көнкүреш хезмәте күрсәтү комбинатында да  җитәкче  буларак үзен күрсәтергә өлгерә, оешмага яңа сулыш өрә. Район җитәкчелеге алмашынганнан соң кабат авыл хуҗалыгына, “Кыят” тәҗрибә-җитештерү хуҗалыгына кайта. Зөфәр Фатыйхович хезмәт елларының бу чорын иң уңышлысы дип саный. Мөгезле эре терлекнең баш санын арттыралар, фермаларның барлык биналарына капиталь ремонт ясыйлар. Авыл чиркәвен яңарту да җитәкче инициативасы була. Нәрсәгә генә алынса да, аңа кадәр эшләгән Владимир Сафроновның зур  булышлыгын тоя, грамоталы, тәҗрибәле белгечләрнең киңәшләренә таяна.  
Шулай бай хезмәт тәҗрибәсе туплаган Зөфәр Садыйков менә 13 инде ”Татмелиорация” ачык акционерлык җәмгыяте системасындагы  “Гидросервис” җәмгыятен җитәкли. Югары Лашчыда, Мөкерледә, Яңа Суыксуда, Ырыңгыда, Иске Тинчәледә, Кайбычта буаларны капиталь төзекләндереп, Яшевка, Кызыл Октябрь  авылларында яңаларын төзеп, күпме рәхмәт сүзләре ишетте ул. Яңа Тинчәле кырларын ясалма сугарып,  уңдырышлылыкны арттыру да әлеге оешма рәхмәтендә ирешелә. Үзебезнең районнан читкә чыгып та хезмәт күрсәтәләр. Авыл хуҗалыгы предприятиеләренә ярдәмнәре дә зур.
 Кайда гына эшләсә дә, Зөфәр Фатыйхович үзен оста оештыручы, грамоталы белгеч,  кешеләр белән уртак тел таба белүче җитәкче булып танытты, коллективта хөрмәт казанды. Әлбәттә, аның хезмәтен Хөкүмәтебез дә югары бәяләде. Ул “Агропромышленность комплксының мактаулы хезмәткәре” исемен йөртә, “Татмелиорация”нең көмеш билгесенә, күпсанлы Мактау грамоталарына һәм рәхмәт хатларына лаек булды.
 Ә аның өчен беренче урында  һәр башлангычка этәргеч бирүче, өметләренә ышанучы гаиләсе булды. Тормыш иптәше Зифа белән бер ул һәм кыз тәрбияләп үстерделәр. Земфира юрист белгечлеге алып, уңышлары белән сөендерә, уллары Занил әлегә мәктәптә  укый. Үзе әтисе  үрнәгендә тәрбияләнгәнгә  балаларын да  максатка ирешү өчен эштән курыкмаска өйрәтә. Тырыш җитәкче булудан тыш, ышанычлы гаилә башлыгы, яраткан әти дә булган Зөфәр Фатыйх улына шушы көннәрдә 50 яшь тула. Гомер бәйрәмен түгәрәк каршылаучы юбилярга җиткерелгән җылы теләкләргә без дә кушылабыз.