Буа муниципаль районы

Буада былтыр коррупция характерындагы 22 җинаять теркәлгән

2014 елның 14 марты, җомга

Узган ел Татарстанда коррупция характерындагы 1319 җинаять теркәлгән. Шуларның 22се безнең районда.
Буа ОВДсыннан алынган мәгълүматларга караганда, хокук бозуларның күбесе вазифаи вәкаләтләрне арттыру, ришвәт алу очраклары белән бәйле. Соңгысында чит ил гражданы да “эләкте”. Ул үзен һәм бергә яшәүче хатын-кызны административ җаваплылыктан азат итү, киләчәктә миграция законнары буенча аларга карата тикшерү үткәрмәсеннәр өчен полициянең участок вәкиленә 2000 сум акча “төрткәндә” тотыла. Җиңел акча эшләүдә һәм вазифаи алдауда “остарган” үзәк дәваханә табибына карата да җинаять эше кузгатылды. Ул пациентка медицина тикшерүен үткәрмичә генә “больничный” язып биргән. Бу ялган факт оператив-эзләнү барышында билгеле булды. Кешеләрне акчага “ял иттерүче” табиб суд каршына басты.
Авылларда да коррупционерлар тик ятмый. Хокук саклау органы хезмәткәрләре бер авыл башкарма комитетының эшчәнлеген тикшергәндә берьюлы 8 (!) закон бозу очрагын ачыклаганнар. Авыл җирлеге башлыгы 8 кешегә хуҗалык китабыннан ялган өземтәләр биргән. Документка “юмарт” җитәкче бу гаебе өчен РФ Җинаять кодексының 286 маддәсе 2 бүлеге нигезендә җаваплылыкка тартылды. Икенче бер авылда авыл җирлеге секретаре, үз вазифасыннан файдаланып, ике граждан исеменнән ышанычнамә һәм ике йортка сату-алу килешмәсен рәсмиләштерә. Шулай итеп мошенник 720 мең сумлык зыян эшли. Ул да башкалар кебек суд җәзасын алды.
Әлеге фактлар турында узган атнада уздырылган муниципаль район башлыгы каршында эшләп килүче коррупциягә каршы көрәш комиссиясенең чираттагы утырышында әйтеп кителде. Моңа карата муниципаль район башлыгы Азат Айзетуллов үтә тискәре мөнәсәбәтен белдерде:
- Коррупция – “пычрак” куллар авыруы ул. Безнең эшчәнлектәге һәрбер кечкенә генә ялгышлык та халыкның җирле үзидарәгә генә түгел, ә дәүләт системасына карата да ышанычын югалтуына китерергә мөмкин, - диде. Ул бу көнне муниципаль түрәләргә керемнәр турында декларация бирүнең катгый срокларын атады.

Оценить материал и/или оставить мнение

БАРЛЫК ЯҢАЛЫКЛАРНЫ УКУ