Буа муниципаль районы

Штраф түләмәүчеләрне барладылар

2014 елның 18 марты, сишәмбе

Районда юл йөрү кагыйдәләрен бозган өчен штрафлар буенча бурычы 60 мең сумнан күбәеп китүчеләр дә бар. Чираттагы рейд барышында район полиция бүлегенең берничә подразделениесе хезмәткәрләре явызларча түләмәүчеләрне ауладылар.

Полициянең участок вәкилләреннән, икътисади җинаятьләргә каршы көрәш һәм җинаятьчеләрне эзләү бүлекчәләре опервәкилләреннән, ЮХИДИ, балигъ булмаганнар эшләре буенча инспекторлардан төзелгән сигез төркем алдында алкоголь продукциясенең законсыз әйләнеше очракларын ачыклау бурычы да куелды. Төркемнәрнең маршрутлары да билгеләнде. Аның буенча киләсе ике сәгать эчендә полицейскийлар район территориясен тулысынча колачларга тиеш иделәр.

Безне полициянең участок вәкиле Александр Кириллов, районара теркәү-имтихан алу бүлекчәсенең дәүләт инспекторы Рамил Абянов төркеменә билгеләделәр. “Тахаръял” агрофирмасына кергән авыллар юнәлешендә кузгалдык. Юлда “участковый” штраф түләмәүчеләр исемлеген барлап, үзе ачыклаган берничә бурычлының исем-фамилиясен теркәде. Берсе – 1000 сум штрафка тартылган З. Ул яши торган йорт тәрәзәсендә ут яна. Ләкин беркем ишекне ачмады. Икенче бурычлы ундүртенче модельле “Жигули”енда туктады. Полицейскийлар егеткә бурычны үз вакытында түләргә кирәклеген аңлаттылар. Соңрак белештем: ул икенче көнне үк штраф акчасын илтеп түләгән.

Рейд барышында башка “коллегаларыбыз” да полиция бүлегенә 5 штраф түләүдән качучыны китергәннәр, яңаларын да тапканнар. ЮХИДИ хезмәткәрләре 4 автомобиль йөртүчегә тизлекне арттырган, 1сенә карата иминлек каешын эләктермәгән өчен беркетмә тутырганнар.

Ел башыннан бирле районда Татарстан Эчке эшләр министрлыгының “Юл хәрәкәте куркынычсызлыгын тәэмин итү чаралары турында”гы 21нче боерыгы нигезендә полициянең берничә подразделениесе катнашында 9 рейд үткәрелгән. Анда юл йөрү кагыйдәләрен бозучылар белән беррәттән алкоголь продукциясен законсыз сатуның 4 факты ачыкланган. Шуның ике очрагында алынган спиртлы эчемлекләрне Татарстан Эчке эшләр министрлыгының эксперт-криминал үзәге белгечләре кеше гомеренә куркыныч дип тапканнар. Алар буенча җинаять эше кузгатылган. Калган икесе тикшерү стадиясендә. Соңгы вакытта полицейскийлар район территориясенә Казахстаннан кертелүче ялган аракыны, Ульяновск шәһәренең техник спиртын җибәрү каналларын оператив эзлиләр. Моның белән беррәттән көмешкә сатучылар белән дә көрәш тынмый.

Оценить материал и/или оставить мнение

БАРЛЫК ЯҢАЛЫКЛАРНЫ УКУ