Буа муниципаль районы

Тыңлагыз, халык уен кораллары оркестры уйный

2014 елның 18 марты, сишәмбе

Чормада тузан җыеп яткан гитара, гармуннар, хәтта гөслә дә эшкә китте, аннары балалайкалар тавышы кушылды – Чуаш Киштәге мәдәният йорты каршында халык уен кораллары оркестры оешты.
Әйтергә генә җиңел. Моның нинди мәшәкатьле эш икәнен авылның мәдәният йорты директоры Федор Петров барыннан да яхшырак белә.
- Халык уен кораллары оркестры оештырырга күптән теләдем. Хыялга ашмаслык булып тоелган иде, тырыша торгач, тәки оркестрлы булдык, - ди ул. Коллегасы – сәнгать җитәкчесе хатыны Тамара йорттан-йортка диярлек йөреп, авылдашлардан күптән ачмаган сандыкларны, шкафларны ачтырдылар, чормаларны айкаттылар. Эзләсәң, бар икән ул байлык! Владимир Бакланов һич кызганмыйча ике балалайка тоттырды, гитара, гармун, баян белән сөендерүчеләр дә булды, гөслә дә табылды. Дөрес, берсе дә идеаль хәлдә түгел инде. Ватылганнарын Федор үзе төзекләндерде. Баксаң, балалайкага гитара кыллары туры килә икән. Буа музыка мәктәбе биргән ике кече гөсләне күктән төшкән бәхет кебек кабул иттеләр. Шулай тупланган оркестр былтыр Татарстанның атказанган мәдәният хезмәткәре Василий Хмелев истәлегенә уздырылган “Тере тавыш” смотр-конкурсында районда икенче урын алды. Быел “музыкантларның” исәпләре зурдан: район мәдәният идарәсе аларга өр-яңа 7 бас-балалайка кайтартты. Португалиядә эшләнгән музыка кораллары нинди генә авазлар чыгармыйлар да, нинди генә көйләр башкармыйлар.
...Тик алар музыканы ишетә белүчеләр кулында гына “җанлана” шул.
- Оркестрга 4-10 сыйныф укучылары арасыннан иң музыка җанлыларын сайлап алдым. Атнага 4 тапкыр репетициягә җыелабыз. Оркестр составындагы төрле уен коралларында уйнарга өйрәтәм. Балаларга бигрәк тә балалайка ошый. Атаклы балалайкачылар Андрей Горбачев, Евгений Быков, Владимир Конов белән кызыксыналар,- ди Федор Васильевич.
Оркестр агач кашыкчылар, барабанчы, гөсләче, думбрачы да бар. Ышкы тавышы да кушыла. Баян партиясен алып баручы абсолют ишетү сәләтенә ия Данил Зайцев Федор Петров киңәшен тотып музыка училищесына укырга кергән иде. Хәзер, әнә, югары белемле музыка белгече оркестр өчен хәзинә.
- Милли стильдә туйлар уздыру гадәте бетте, яшьләр колагында гел заманча музыка. Халык уен коралларын торгызып, гореф-гадәтләребезне дә “уятабыз”. – ди мәдәният йорты директоры.
Чуаш Киштәге оркестры “гастрольләргә” дә чыккалый. Авылда мәдәни чаралар аның катнашыннан башка үтми. Үткән чәршәмбедә исә шәһәрнең М. Вахитов исемендәге гимназиясендә, Р. З. Сәгъдиев исемендәге мәктәптә яшь музыкантлар чыгышын бик җылы кабул иттеләр. Бу юлы оркестрга танылган баянчы Илдар Нуруллин да ярдәм итте. Күрәсең, яшь буын арасында да халык уен коралларын яратучылар бар әле: уйнаучылар да, тыңлаучылар да!

Оценить материал и/или оставить мнение

БАРЛЫК ЯҢАЛЫКЛАРНЫ УКУ