Буа муниципаль районы

Бадминтонны олысы-кечесе уйный

2014 елның 22 марты, шимбә

Ике-өч ел элек яңа спорт төре буларак килеп кергән бадминтон көннән-көн популярлаша бара. Зур чыгымнар, күп кешелек командалар таләп итмәгән бу уенны мәктәпләрдә дә, оешма-предприятиеләрдә дә уйныйлар.
Алай гына да түгел, иң нәни һәм 50 яшьтән өлкәнрәк буалы бадминтончылар район, зона, республика бәйгеләрендә теләп катнашалар һәм уңышларга ирешәләр. Әлеге спорт төрен үстерүгә һәм җиңүчеләр әзерләүгә Әлки төп гомуми белем бирү мәктәбенең физкультура укытучысы Айдар Сәлахов, Исәк урта мәктәбеннән Илгиз Камәртдинов, Алшихтан Владимир Владимиров, Ырыңгыдан Валерий Салабайкин зур өлеш кертәләр. Бүген “Яшьлек” спорт мәктәбендә бадминтон бүлеге ачу буенча эшләр бара. Инде яңа уку елыннан барлык теләүчеләр спорт төркемнәренә языла һәм күнегүләрне спорт мәктәбе статусында үткәрә алачаклар. Балаларны мәктәбебездә көтеп калабыз.
Әйткәнемчә, әлеге спорт төре балалар белән бергә өлкәннәрдә дә зур кызыксыну уятырга өлгерде. Район хакимиятендә, Буа электр челтәрләрендә, ЗУЭСта, шикәр заводында, “Буа газы” эксплуатация-җитештерү идарәсендә, ветеринария техникумында, Татар Буасы, Адав-Толымбай, Алших, Күшке авыл җирлекләрендә хезмәт куючылар арасында бадминтон аеруча популяр.
Район башкарма комитеты җитәкчесе, бадминтон федерациясе рәисе Сәлим Даутов тәкъдиме белән районда бадминтонны үстерү буенча попечительлек советы оештырылды. Аңа җәмәгатьчелек тәртибендә ЗУЭС җитәкчесе Петр Белов җитәкчелек итә. Нәкъ менә аның инициативасы буенча иртәгә һәм берсекөнгә, ягъни 22-23 март көннәрендә 9.00 сәгатьтә “Яшьлек” спорт мәктәбе базасында Таттелеком призларына районара турнир оештырыла. Җиңүчеләрне дүрт яшь төркемендә - 2001 елда туганнар һәм аннан яшьрәкләр, 1998-2000 елгылар, 1997 елда туганнар һәм 39 яшькә кадәргеләр, 40 яшьлекләр һәм аннан өлкәнрәкләр арасында ачыклаячаклар. Ярышлар ир балалар һәм кызлар, ир-егетләр һәм хатын-кызлар арасында аерым, парлы һәм катнаш разрядта үткәрелә. Барлык теләүчеләрне көтеп калабыз.

Оценить материал и/или оставить мнение

БАРЛЫК ЯҢАЛЫКЛАРНЫ УКУ