Буа муниципаль районы

“Катюша” яшьлеккә алып кайтты

2014 елның 27 марты, пәнҗешәмбе

Район мәдәният йортында узган “Безне Катюша җиңүләргә рухландырды” республика конкурсының зона этабы рус халык җырларын үз итүчеләр өчен зур бүләк булды. Сугыш хәтирәләренә, совет солдатының батырлыгына багышланган музыкаль композицияләрне тамашачы тын да алмыйча тыңлап утырды.
Кайбыч районының “Вьюга” вокаль ансамбле башкаруындагы “О той весне”, “Закаты алые” җырлары олы буынны яшьлекләренә алып кайтты, һәрберсе авылның гүзәл табигатен күз алдына китерде, кичә генә сөйгән кызы белән су буенда йөргән яшь егетнең сугышка китүе, аның туган ягын сагыну сагышы белән сугарылган җырдан күзләре яшьләнде. Сугыш темасы Кама Тамагының “Калейдоскоп” ансамбле ир-егетләренең чыгышында да дәвам итте. Алар танылган җырлардан попурри башкардылар. Данлыклы “Катюша” җырына залдагылар да кушылды.
Сугыш ачысы тылдагыларның да үзәгенә үткән. Үзебезнең Кыят авылының “Сударушка” вокаль төркеменең “Вдовы России” җыры тамашачыга әби-апаларыбызның, сугыш чоры балаларының авыр хезмәтен, тирән кичерешләрен җиткерде. Җиңү яулаган ветераннарыбызга, аларның толларына яшьләр дә - Чүпрәледән Анастасия Сердцева, Апастан Аделина Закирова, Гөлнара Галиәкбәрова, Буадан Сиринә Хәсәнҗанова, Ильяс Киньягулов, Олеся Васина да дан җырладылар. Олылырдан Тәтештән Сергей Ерастовның, Буадан Наталия Арисованың үзенчәлекле тавышлары күңелләрне “актарды”.
- Идел аръягы районнары талантларга бай икәнен без белә идек инде. Бүгенге бәйге моның ачык мисалы. Үзәккә үтәрлек җырларыгыз өчен рәхмәт сезгә! – дигән теләкләрен җиткерде жюри рәисе, Казан дәүләт мәдәният һәм сәнгать университеты доценты Диана Гарипова. Ул традицон мәдәниятне үстерү республика үзәгенең баш белгече Лилия Моратова белән берлектә катнашучыларга дипломнар тапшырды. Ә республика этабына үтүче җиңүчеләрнең исемнәрен алар соңрак әйтәчәкләр.

Оценить материал и/или оставить мнение

БАРЛЫК ЯҢАЛЫКЛАРНЫ УКУ