Алар булган җирдә һәрчак бәйрәм

Район мәдәният хезмәткәрләре Адав-Толымбай авылы клубында һөнәри бәйрәмнәрен билгеләп үттеләр. Анда алдынгыларны бүләкләүләр дә, җыр-бию дә мулдан булды.
Тамашачы залына килеп керүгә үк бәйрәм атмосферасына чумасың: сәхнә алдында пешкән ризыклардан сыгылып торган табын, кул эшләреннән, төрле конкурс-бәйгеләрдәге уңышлары өчен бирелгән кубоклардан, медальләрдән торган күргәзмәләр чарага килгән һәрбер кешенең игътибарын җәлеп итте. Бәйрәм кунаклары районның мәдәни тормышы белән слайд аша да таныштылар.
 Чараны муниципаль район башлыгының беренче урынбасары Илдар Еремеев ачып җибәрде:
-Тормышыбызның башка өлкәләре мөһим булган кебек, безгә мәдәниятебез дә кадерле. Сез халыкның рухи байлыгын үстерүдә күп көч куясыз. Район данын Россиягә һәм Татарстанга танытасыз. Үзегезгә алмашка яшь буын тәрбияләүдә дә актив эшлисез. Үрнәк өлгесен төшермәгез, гел шулай уңышларга гына ирешергә язсын, - диде ул. Аннан соң Ырыңгыдан Галина Матросовага, Яңа Чәчкаптан Хөрия Җиһаншинага, Адав-Толымбайдан Айрат Мостафиевка, Нурвахиттан Ландыш Сәгъдиевага, Әлкидән Алсу Гыйниятуллинага, район мәдәният сараеннан Клавдия Чебаковага, Асия Минһаҗевага, Инна Минхановага муниципаль район башлыгының Мактау грамоталарын тапшырды.  Чираттагы котлау сүзләрен коллегаларына район мәгариф идарәсе начальнигы Мөдәррис Гайфуллин ирештерде.
-Без күптән түгел Казанга барып, республика җитәкчелегенең дә тәбрикләүләрен алып кайттык. Анда РФ Мәдәният министры Владимир Мединский да бар иде. Ул Татарстанның мәдәни үсешендә безнең районның да өлеше зур булуын әйтеп үтте һәм якташыбыз, Буа драма театры җитәкчесе, Татарстанның атказанган артисты Раил Садриевка министрлыкның Мактау грамотасын тапшырды. Безнең өчен бу зур горурлык. Барыбызга да мондый биек үрләр яуларга язсын. Бәйрәм белән, хезмәттәшләрем, - диде һәм мәдәният идарәсе исеменнән дә Мактау грамоталары тапшырды.
 Ә аннан сәхнә бәйрәм “гаеплеләренә” бирелде. Нәни артистлардан алып өлкәненә кадәр иҗади сәләтен күрсәтте. Тамашачылар Адав-Толымбай балалар бакчасында тәрбияләнүче сабыйлар чыгышын, “Сезам”, “Биение сердца” төркемнәренең дәртле биюләрен, җирле артистларның “Шалкан” театральләштерелгән композициясен  рәхәтләнеп карадылар, җырчыларның чыгышларын көчле алкышларга күмделәр. Сәләт яшькә карамый, диләр. Моның шулай икәнлеген Адав-Толымбай авылыннан 83 яшьлек Миңнебану Җаббарова раслады. Башкорт халык биюен яшьләргә биргесез осталык белән башкарды. Мөдәррис Гайфуллин да сәхнәгә йөгереп менеп, аңа кушылды. Сәхнә ветераны да  аның кулыннан Мактау грамотасы алды. Шундый ук бүләкләргә башка ветераннар - Сәрия Хәйруллина, Гөлсинә Мөлекова, Линард Гыйззәтуллин, Иван Николаев, Азат Измайлов, Владимир Петров та лаек булдылар.
Ә аннан иң дулкынландыргыч мизгелләр – ел дәвамында иң яхшы күрсәткечләргә ирешкән мәдәният йортларын игълан итү вакыты килеп җитте. Мактаулы өченче урын Зур Фролово клубына бирелде. Икенчелекне Чуаш Киштәгенеке алды. Ә елның иң яхшы мәдәният йорты дип Вольнистан авылыныкы танылды. Аларның барсына да кыйммәтле бүләкләр тапшырылды.