Хуҗалыклар чәчүгә әзер

Быел “Тахаръял” агрофирмасында соя культурасын игәргә планлаштыралар. Аны чәчү комплексы әзер инде.
Җәмгыятьнең Әлши машина-трактор паркында район җитәкчеләре, агрофирмалар директорлары, баш агрономнары һәм инженерлары катнашында узган семинар-киңәшмәдә хуҗалыкларның язгы кыр эшләренә әзерлеге, оештыру мәсьәләләре тикшерелде.
- Бу җаваплы эшкә керешкәнче булган кимчелекләр-не мөмкин кадәр киметергә, үткән елгы хаталарны кабатламаска, кырда эшне оешкан төстә ике сменада алып бару өчен чәчү агрегатларына белемле, тәҗрибәле механизаторлар беркетергә, аларга уңайлы эш шартлары булдырырга кирәк,- диде киңәшмәне башлап муниципаль район башлыгы Азат Айзетуллов.
Бу көннәрдә хуҗалыкларда чәчүдә файдаланылучы комплексларны кабул итү бара. Механизаторлар хезмәтенә сүз әйтерлек тү-гел. Техника  узган көздән сыйфат белән ремонтлап калдырылгач, быел көйләү чараларын үткәрүе дә җиңел.
“Тахаръял”да 3500 гектарда бөртекле-кузаклы культуралар, 1000 гектарда – шикәр чөгендере, 850 гектарда – кукуруз һәм 150 гектарда соя чәчеләчәк. Бу эшкә ун комплекс җәлеп ителәчәк. Директор Радик Гыйсмәтовның әйтүенчә, чәчүне ике сменада ун көндә төгәлләүне планлаштыралар. Моның өчен механизаторлар белән укулар үткәрелгән, бүген-нән һәр тармакка җаваплы белгечләр беркетелгән. Ындыр табагында да эш кайный. Орлык агулау машиналары төзекләндереп, көйләп куелган.
“Россельхозүзәк”нең Буа районара бүлеге начальнигы Радик Ибәтуллин чәчүлек материалын лабораториядә тикшертеп, тишелеш дәрәҗәсен бел-гәннән соң гына җир куенына салырга кирәклеген җитәкчеләрнең исләренә кабат төшерде.
Авыл хуҗалыгы һәм азык-төлек идарәсе начальнигы Радик Даутов эш барышында бигрәк тә техника куркынычсызлыгы таләп-ләрен төгәл үтәргә чакырды.
Язгы кыр эшләренә районда “Коммуна” җәмгыяте, “Дружба”, “Авангард” агрофирмалары аеруча югары әзерлектә киләләр. “Авангард”та 45 трактор да төзек. “Дружба”да да аларның төзеклеген тикшереп, эшләтеп карадылар. “Коммуна” механизаторлары шулай ук үзләреннән торганның барысын да эшләделәр. Калганы табигать шартларыннан гына тора.
“Нива” агрофирмасы игенчеләре дә үз карамакларындагы тагылма җиһазларны агрегатлаштырырга керештеләр.
- Тракторларга килгәндә, эш барышында  зур проблемалар булмаска тиеш, чәчүдә аларга тәҗрибәле механизаторлар идарә итәчәк,- ди  директор Сергей Бахтинов.
Язга әзерлекнең ни дәрә-җәдә булуын вакыт күрсә-тәчәк. Ә кырлар тракторлар гөрелтесенә күмелер көннәргә күп калмады.