Ирешкәннәр һәм проблемалар турында

Узган җомгада Буада эшлекле визит белән Россия Федерациясе Дәүләт Думасы депутаты Илдар Гыйльметдинов булып китте. Аның визитының төп максаты район тормышы белән танышу һәм социаль-төзекләндерү өлкәсендәге проблемаларны уртага салып сөйләшү иде.
Кунак танышуны шәһәрнең 1 номерлы мәктәбеннән башлады. Ул биредә шә-һәр мәктәпләре укучылары арасында оештырылган “Аҗаган” хәрби-спорт уеннарын карады. Депутат район мәдәният сараенда да булды. Бу вакытта анда “Йолдызлык-Созвездие” фестиваленең зона этабы үтте. Илдар Ирекович анда катнашучылар чыгышын да тамаша кылды. Ә алты районнан килеп укучылар өчен яшәү базасы да булган лицей-интернат тормышы аңарда аеруча кызыксыну уятты. Аны укучыларның уйлап табу сәләте дә шаккатырды – информатика түгәрәгендә шөгыльләнүче алтынчылар кунакларга үзләре иҗат иткән роботны күрсәттеләр һәм үз куллары белән ясаган медальләр бүләк иттеләр. Депутат бер уңайдан шә-һәр үзәк стадионында да булды. Ул биредәге футбол кырына дренажлы ясалма япма җәю һәм мәй-данны яктырту мәсьәлә-ләрен тизләтүдә ярдәменә ышандырды.
Очрашуның рәсми өлеше 1 номерлы сәнгать мәктә-бендә узды. Илдар Гыйльметдинов анда мәдәният һәм мәгариф өлкәсе хез-мәткәрләре, спортчылар һәм авыл җирлекләре башлыклары белән очрашты. Анда чыгыш ясаган муниципаль район башлыгы Азат Айзетуллов мәдәният һәм мәгариф объектларының торышы һәм эшчәнлеге белән таныштырды:
- Хәзерге вакытта Зур Фроловода балалар бакчасы һәм спорт залы белән яңа мәктәп салу алда тора, Шәмәктә күпфункцияле үзәкне төзеп бетерергә кирәк. Ләкин аларны алып баруга дәүләттән акча сорау өчен иң элек коллективларда уңай эш күрсәт-кечләр күрсәтү сорала, - диде ул. Шулай ук элеккеге һөнәр училищесы бинасын район үзәк дәваханәсе поликлиникасы итеп үз-гәртүне тизләтү мәсьәлә-сен дә күтәрде.
Шәһәрнең лицей-интернаты директоры Әлфир Вә-литов исә үзе җитәкчелек иткән уку йортының уңышлары турында бәян итте, берочтан уку йортына чираттагы капиталь ремонт кирәк булачагын да әйтте.
“Яшьлек” спорт мәктәбе директоры Владимир Храмов буалыларның спортта ирешүләре белән таныштырды. Проблемаларга туктады: балаларны төрле ярышларга алып бару өчен автобуслар, күнегүләр алып барырга – заллар, хезмәт хакы аз булу сәбәп-ле, тренерлар җитми. Бу, кагыйдә буларак, спорт белән шөгыльләнүчеләр саны кимүгә китерә. Директор Буага заманча спорт комплексы кирәклеген ассызыклады.
Район мәдәният идарәсе начальнигы Мөдәррис Гайфуллин исә заманча мәдә-ният йорты кирәклеге турында сүз кузгалтты, китапханәнең дә өчен катта урнашуы әдәбият сөюче-ләр өчен уңайсызлык тудыруын да өстәде.
Чыгышларны тыңлаганнан  соң Илдар Гыйльметдинов йомгаклау сүзен әйтте:
- Сезнең ирешүләр күз алдында. Шуңа күрә дә мәдә-ниятне, мәгарифне, спортны үстерүгә средстволар сорарга тулы хакыгыз бар. Сез кузгалткан проблемалар хәл ителмәслек түгел. Хәзерге вакытта әлеге өл-кәләрне үстерүче федераль һәм республика программалары эшли. Аларда катнашыгыз. Активрак булыгыз, инициативалар күр-сәтегез. Менә, үз средстволарыгыз хисабына заманча спорт комплексы төзүгә керешкәнсез. Мондый объектлар республикада да берничә генә. Аның тө-зелешен алга таба тормышка ашыруда булышачакмын, - диде ул.
Депутат мәктәпләрне оптимальләштерү, бердәм дәү-ләт имтиханнары буенча да үз фикерен белдерде:
- Болар бер-берсенә бәйләнгән. Авылдагы аз комплектлы мәктәпләрне кыскарту финанс чыгымнарына гына бәйләнгән дип уйлыйсызмы? Юк! Мәсәлән, авылда биология укытучысы химия дә, физика да укыта. Әмма мондый “универсаль” укытучы биргән белем белән укучы югары сыйныфта бердәм дәүләт имтиханнарыннан югары баллар алаламы?! Әлегә мин БДИгә альтернатива күрмим. Бу, минемчә, көч-ле укучының престижлы вузларга керә алуына бердәнбер юл. Икенче яктан, имтиханнарда “икеле” алучыга белешмә биреп чыгару шулай ук дөрес түгел. Бу аның хокукларын бозу, бәлки алдагы карьерасына зур киртә куюдыр да.