Буа муниципаль районы

Җиңүнең 70 еллыгын каршылап

2014 елның 5 мае, дүшәмбе

Тиздән Бөек Җиңүгә 69, бер елдан юбилейлы дата – 70 ел тула. Районда әлеге вакыйгага әзерлек эшләре былтырдан ук башланды. Аның барышы хакында район башкарма комитеты җитәкчесенең социаль мәсъәләләр буенча урынбасары Лилия Садретдиновадан сораштык.
- Бүгенге көндә районда 98 ветеран яши. Соңгы елларда сугышта һәлак булганнарның толларына, алар районда 498 кеше, тыл хезмәтчәннәренә, алар 1480 исәпләнә, карата да игътибар артты. Аларга да быел Җиңү көне күчтәнәче – Татарстан Президенты Рөстәм Миңнехановның тәбрикләү открыткаларын һәм акчалата бүләкләр тапшырылачак.
Райондагы оешма-предприятиеләр үзләренә беркетелгән ветераннарга ярдәм итә. Бу эштә бигрәк тә “Элеватор” җәмгыяте, “Дружба”, “Тахаръял”, “Нива” агрофирмалары, шикәр заводы, ветеринария техникумы хезмәткәрләре актив. Алар өй эшләрендә булышып торалар, азык-төлек пакетлары өләштеләр. Ялгыз, даими ярдәмгә мохтаҗларны социаль хезмәткәрләр карый, һәрбер ветеран үзенә беркетелгән табибка шәхсән мөрәҗәгать итә ала.
Бәйрәм якынлашу уңаеннан ветераннар өчен махсус чаралар үткәрелә. Мәсәлән, шушы көннәрдә хәйрия акциясе – “Минем гәҗит” газетасына бушлай яздыру кампаниясе старт алды. Моннан ике көн элек район җитәкчелеге шәһәрнең картлар һәм инвалидлар өчен интернат йортта яшәүче сугышта шаһитлары белән очрашты. Ә бүген ? ветеран Казан шәһәрендә, М. Җәлил исемендәге опера һәм балет театрында уздырылган Җиңүгә багышланган тантаналы чарада катнаша.
-Бу эшкә мәктәп укучылары, студентлар да җәлеп ителгән иде. Алар нинди ярдәм күрсәтә?
-Волонтерлык хәрәкәте отрядлары “Ветеран” акциясе барышында сугышта катнашучыларның өйләренә барып эшләделәр. Шәһәрнең 1 номерлы мәктәп укучыларыннан торган “Хәтер маршы” отряды туган якны өйрәнү музее хезмәткәрләре белән бергәлектә тагын 14 сугышта хәбәрсез югалган якташларыбызның исем- фамилияләрен эзләп таптылар. Алар турындагы кыйммәтле мәгълүматларны яшь “черепановчылар” әлеге көнгә кадәр билгесез булып саналган сугышчыларның балаларына, якыннарына тапшырачак. Яшь буын һәр елны солдат обелисклары, һәйкәлләр тирәләрен җыештыру эшендә дә актив катнашалар. Шулай ук алар ветераннарның кадерле кунаклары да. Кичәге солдатлар һәр очрашуда сугыш турындагы хәтирәләрне балаларга сөйләп яңартырга яраталар. Батырлык кыйссасы балаларда зур кызыксыну уята. Мәсәлән, күптән түгел «Гармония» социаль хезмәт күрсәтү үзәге каршындагы “Преодоление” һәм “Яшүсмер” клубына йөрүче балалар Бөек Ватан сугышы мемориалы музеенда булдылар. Һәлак булган солдатларның шәхси әйберләрен карау аларда онытылмаслык тәэсирләр калдырды.
Ел әйләнәсендә үзәк һәм мәктәп китапханәләрендә сугыш темасына күргәзмәләр, конкурслар, хәтер сәгатьләре, “Бөек Ватан сугышы турында 70 китап укы” акциясе оештырылды. Җиңү көнендә тагын бер акция узачак. Шәһәр урамнары буенча “Буа электр челтәрләре” җәмгыяте “Без сугышны белмәгән өчен рәхмәт, сезгә” яшьләр авточабышын оештыра. Минемчә, мондый чаралар яшьләргә патриотик тәрбия бирүдә зур роль уйный. Киләчәктә дә райондагы күп чаралар сугыш тематикасын яктыртуга багышланачак.
Якынлашып килүче Җиңү көне уңаеннан район халкына тыныч күк йөзе, бәхетле балалар, озын гомер телим. Ә ветераннарга, толларга, тыл хезмәтчәннәренә безгә якты көннәр бүләк иткән өчен зур рәхмәт!

Оценить материал и/или оставить мнение

БАРЛЫК ЯҢАЛЫКЛАРНЫ УКУ