Кабул итү комиссияләре ишек ачты

Бердәм дәүләт имтиханнарыннан шүрләп балаларын тугызынчы сыйныфтан соң ук мәктәптән чыгарып, урта-махсус уку йортларына урнаштырабыз диюче әти-әниләр елдан-ел күбәя. Бу хәл шәһәрдәге ветеринария техникумына, медицина училищесына абитуриентлар агымын күбәйтмәдеме? Әлеге уку йортларындагы кабул итү комиссияләрендә булып, укырга керү шартлары белән таныштык.
Ветеринария техникумында кабул итү комиссиясе 1 июньнән, медицина училищесында 20 июньнән эшли башлаган. Уку йортларына абитуриентлар аттесттагы уртача билге буенча кабул ителәләр, икесендә дә гариза язучының төп дәүләт һәм бердәм дәүләт имтиханнары нәтиҗәләре безнең өчен мөһим түгел, дип ышандыралар.  Хуш, ә менә документлар тапшырырга килүчеләр белән ничек, алар азайганмы, күбәйгәнме? Сүз уңаеннан, район мәгариф идарәсеннән алынган мәгълүматларга караганда, быел 509 укучы тугызынчы сыйныфтан соң мәктәптән киткән, былтыр аларның саны 524 булган.
Медицина училищесында
Татарстан Республикасының Сәламәтлек саклау министрлыгы рөхсәте булса, әлеге уку йортында беренче курс студентларыннан 3 төркем тупланачак. Бюджет урыннарның төгәл саны да хәзергә билгесез әле. Былтыр 25 студент бюджеттан тыш, 59ы бюджет төркемнәрдә һөнәри белем алган.  Бюджет урыннар чикле, түләүле нигездә керүчеләр барысы да кабул ителәчәк. Шуңа да медицина белгечлеге алырга килүчеләр оттырмаячак дип белдерә кабул итү комиссиясе әгъзалары.
- Абитуриентлар килә генә башлады әле. Шуңа да бюджет урыннарга керүчеләр арасында конкуренция булырмы, юкмы, әйтә алмыйбыз. Тик шунысы көн кебек ачык: биредә укытып чыгарылган әзер кадрларга кытлык зур. Чыгарылышларыбызны эшкә җибәрүләрен сорап заявкалар күп килә, - ди кабул итү комиссиясенең җаваплы секретаре Фәридә Борнашева.
Ветеринария техникумында
Әлеге уку йортында кабул итү комиссиясе инде бер айдан күбрәк вакыт эшли. Абитуриентлар күп тә түгел, аз да түгел, елдагыча килә дип белдерделәр комиссия әгъзалары. Бюджет урыннарга гына укырга  кабул итүче ветеринария техникумында быел 8 төркемгә бүленеп 210 студентка белем  алу шансы бар, узган ел 180 иде. Әлеге санны Татарстан Республикасы Мәгариф һәм фән министрлыгы әйтә. Аның фәрманыннан башка уку йортының студент-урыннарның санын арттырырга хакы юк. Абитуриентлар күбәйсә, алар арасында көндәшлек көчәячәк, ягъни кемнең уртача билгесе зуррак, студент булу бәхете шуларга елмая. Мисал өчен былтыр бер урынны 2-3 кеше дәгъвалаган. Бәхәсле очракларда,  әйтик,  берничә абитуриентның аттестатының уртача баллары бертөрле зурлыкта булса, ул үзләштерергә теләгән белгечлеккә туры килүче профиль предмет буенча төп дәүләт имтиханы билгесе  хәлиткеч роль уйный.
Резедә Мостафина, ветеринария техникумы директорының тәрбия эшләре буенча урынбасары:
- Ветеринария техникумы өч белгечлек буенча унберенче сыйныф тәмамлаучыларны да кабул итә. Аларны да аттестатларындагы уртача билге буенча кабул итәбез, БДИ балларын исәпкә алмыйбыз. Унбердән соң килүчеләр беренче елны ук  икенче курста укый башлаячаклар. Белемле, актив, үзенә нәрсә кирәкне ачык аңлаучы студентларны көтеп калабыз.