Урып-җыю эшләре башланучы июль ае җитте.

Авыл хуҗалыгы һәм азык-төлек идарәсенең җитештерү-маркетинг бүлегенең механикалаштыру буенча консультанты Рәис Юнысов әйтүенчә, быел комбайнчылар алдында 55050 гектарда бөртекле һәм бөртекле-кузаклы культураларны җыеп алу бурычы тора. Район кырларында төрле маркадагы 149, шартлы “ДОН”га күчереп исәпләгәндә 176 комбайн эшләячәк. Бер физик комбайнга – 370, шартлы “ДОН”га 311 гектар мәйдан туры киләчәк. Былтыр бер “ДОН” тәүлегенә 12 гектарда эш башкарган дип исәпләсәк, урып-җыюны 26 көндә төгәлләү мөмкинлеге бар. Тик уңыш кына, быелгы катлаулы һава торышына бәйле рәвештә, кертелгән акчага һәм планлаштырылганга караганда кимрәк көтелә. Үсентеләрнең сирәк һәм тәбәнәк булуы урып-җыю агрегатларын аеруча җентекләп көйләүне сорый. Таләпләр бөртек кенә түгел, ә салам һәм кибәк җыюга да  югары булачак. Бүген  хуҗалыкларда барлык “кыр кораблары” комбайнчылар белән комплектлаштырылган һәм ремонт эшләре бара. Район белгечләре комбайнчылар белән очрашулар вакытында төп игътибарны югалтуларга китерүче сәбәпләрне бетерүгә юнәлтәләр. Комбайнда бөртек коелу мөмкин булган урыннар гына да 50дән артып китә, ә югалтуларга йогынты ясаучы факторлар исә 19га тиң. Һәр комбайн герметиклыкка пологага бөртек коелудан туктаганчы тикшерелергә тиеш. Хуҗалыклар белгечләренә бу чорда урып-җыю технологиясе һәм комбайнда ярыкларга, әйләнешкә, хәрәкәт тизлегенә технологик көйләүләрне үткәрү буенча дәресләр уздыру бурычы куела. Шулай ук комбайнны әзерләгәндә аның янгын куркынычсызлыгы таләпләренә туры килүенә игътибар итәргә, 2 янгын сүндергеч, киез, көрәк, кимендә 40 литр су, ком белән комплектлаштырырга тиеш. Урак башланганчы үткәреләчәк комбайннар парадлары вакытында комбайн механизмнары системасының янгын куркынычсызлыгы таләпләренә туры килүенә дә игътибар биреләчәк.
Агропромышленность комплексы предприятиеләренең агымдагы уракка әзерлеген Татарстанның Авыл хуҗалыгы һәм азык-төлек министрлыгы да тикшерәчәк – республика районнарында 14-19 июль көннәрендә министрлык белгечләре катнашында конкурслар үткәреләчәк. Анда комбайннарның, үзйөрешле чапкычларның, тагылмалы ургычларның, ашлык ташучы автотранспортның техник төзеклеге, герметиклыгы, теркәү белән эксплуатацияләүгә Татарстанның үзйөрешле машиналарның һәм башка төр техниканың техник торышына күзәтчелек итү буенча Идарәсе тарафыннан рөхсәт бирелүе, “кыр кораблары”ның комбайнчылар, янгын сүндерү чаралары, медицина аптечкалары белән комплектлаштырылуы, комбайнчыларның махсус эш киемнәре белән тәэмин ителүе, аларның комбайн белән идарә итүгә рөхсәте булуы беренче урында торачак. Шулай ук урынга чыгучы ремонт звенолары, расланган эшләп чыгару нормалары, ягулык-майлау материаллары чыгымнары, урак барышында комбайнчылар, техникага хезмәт күрсәтүчеләр башкарган хезмәткә түләү бәяләре, матди кызыксындыру чаралары, механизаторларның агротехник паспортлары булуы, ашлык саклау складларының, ындыр табакларының, бөртек киптерү, чистарту җиһазларының, үлчәү хуҗалыгының  әзерлеге, хуҗалыкта мобиль янгын сүндерү техникасы белән ирекле янгын сүндерү дружинасы булуы да урып-җыюны кыска срокта һәм югалтуларсыз башкарып чыгуны тәэмин итәчәк.
Берникадәр вакыт барында комбайннар белән бергә туфрак әзерләүдә һәм көзге чәчүдә катнашачак техниканы да әзерлек сызыгына куярга кирәк.