Отпуск сезоны: ял итәргә кая барабыз

Җәй җитүгә күбебездә “чемоданлы кәеф” башлана. Отпуск ялы алып, берәр айга начальник һәм коллегалардан, көндәлек тормыш мәшәкатьләреннән арынып, баш ташлап ял итү турында хыялланабыз. Кем, тәвәккәлләп, “кыргый ял”га чыгып китә, икенчеләре туристлык агентлыкларының бусагасын таптый. Моннан сорау: буалылар быел кайсы тарафларга ял итәргә баралар? Кайда ял бик “кесәгә сукмый” һәм кайчан арзангарак төшә?
Яшьләр – Төркиягә, өлкәннәр – санаторийга
Туроператорлар бездә икәү. Аларда хәзер “урак өсте”.
- Кеше күп килә, кайчакта юллама рәсмиләштерергә өлгерә алмыйбыз, - диләр кызлар. Яшь һәм урта буын “отпускчылар” арасында Төркиягә, Мисырга, Таиландка турларга, Кара диңгез буена – Анапага, Сочига юлламаларга сорау зур. Соңгы берничә елда Абхазиягә дә “ияләшкән”. Кырымга да хәзер юл ачык.
12 көнлек турлар иң популяры – ялыктырмый да, акча да җитә. Россия шәһәрләре арасында иң җәлеп иткече  Санкт-Петербург. Анда юллама рәсмиләштерүчеләрнең иң өлкәне  74 яшендә. Ә 80 яшен тутыручы әби ...Таиландка барырга тели. Ә күпчелек өлкәннәр туроператорлар аша сатып алынган юлламалара буенча Татарстан, Марий-Эль, Чуашстан санаторий-профилакторийларында сәламәтлекләрен ныгыталар. Яңа өйләнешүчеләр Европа илләренә ялга баралар: Греция, Испания, Италия курортларын сайлыйлар. Ел әйләнәсендә Буадан Великий Устюгка (Кыш бабай резиденциясенә), Зур Болдино авылына (биредә бөек рус шагыйре Александр Пушкиннар династиясе яшәгән) баручылар да шактый. Шулай ук быел районнан 25 кеше Хаҗ кылу өчен Согуд Гарәбстанының Мәккә һәм Мәдинә шәһәрләренә очачак.
Кырымгамы, Испаниягәме?
Парадокс: Россия курортларына юлламаларның уртача бәяләре чит илнекеләргә караганда кыйммәтрәк. Чагыштыру өчен: “Артек” балалар лагеренда ял итү бәясенә ике кеше Испаниядә булып кайта ала. Иң очсыз турлар Төркиягә һәм Мисырга (шуңа да алар популяр, ә “яна торган” юлламалар булса, бигрәк тә отышлы). Санаторий юлламалары бәяләре тагын да кыйммәтрәк. Үзебезнең илдә ял итүнең ни өчен кыйммәтрәк икәнлеген туроператорлар берничек тә аңлата алмыйлар.