Буа өстендә нәрсә очты

2 июль көнне шәһәр өстендә сәер объект пәйда булды.

Ак балыкны хәтерләткән очкыч һавада аның әле бер, әле икенче ягында “йөзде”. Моны күргән кешеләр шунда ук телефон трубкасына ябыштылар – кем кая шалтыратып аның нәрсә икәнлеген белергә ашыкты. Редакция телефоны да бушап тормады. Нәрсә ул? Дистәләгән кеше шушы сорауны бирде.

Ә безгә сорауны Россия Эчке эшләр министрлыгының Буа районы буенча бүлеге начальнгиы Айрат Ханбиковка юлларга тәкъдим иттеләр.

- Буа өстендә очучы объект ул – аэростат. Әлеге метеостанция республика Эчке эшләр министрлыгы линиясе буенча игълан ителгән оператив-хезмәт бурычларын үтәү кысаларында районны өйрәнә. Бу бер-ике көн дәвам итәчәк. Халык борчылмасын, аларга бернинди куркыныч янамый, - диде Айрат Ханбиков.

Иң кызыгы 2 июль бөтен дөньяда НЛО (билгесез очучы объект) көне буларак билгеләп үтелә. Кайбер кешеләр Буа өстеннән очучы объектны да шушы бәйрәм белән бәйле түгелме, дип баш ваттылар.