Элеватор территориясен танырлык түгел

“Буа элеваторы” акционерлык җәмгыятенең генераль директоры Газинур Хәкимов киләчәкне күзаллап эшләүче җитәкчеләрнең берсе. Әлеге коллектив белән идарә итә башлаганнан бирле оешмада бик күп уңай үзгәрешләр булды, эшләр башкарылды.



Директор тарафыннан иң беренче чиратта эшчеләрнең эш шартларын яхшыртуга әһәмият бирелде. Җитештерүнең барлык тармакларындагы эш урыннарында җиһазлар яңасына алыштырылды, урыны белән ремонтланды. Территориядәге юлларга, склад эчләренә бетон түшәлде. Хәзер җәмгыять территориясен танырлык түгел. Һәр бина янында аллы-гөлле чәчәкләр үсә.

Янәшәдә генә чистартуга һәм киптерүгә китерелгән ашлык өемнәре. Кыскасы, исең китәрлек биредәге тәртипне күреп һәм һәркемнең үз эше белән мәшгуль булуына. Теплицада ел әйләнәсе диярлек ашханә өчен кыяр, чөгендер үсә.

Кыскысы, үзеңне элеваторда түгел, ә ниндидер бер зообакчада кебек хис итәсең. Хуҗалыклардан китерелгән ашлык лаборатория аша чисталыкка, дымлылыкка тикшерелгәч, тиешле урыннарга кертеп бушатыла һәм автомобильләр санаулы минутлар эчендә территориядән чыгып китә.

 
Без килгәндә агрофирмалар белән беррәттән Фәнил Кадыйров һәм Салават Айзетуллов фермер хуҗалыкларының арыш төяп китерелгән берничә автомобилләрен кабурл итү бара иде.
-Кабул итеп алынган ашлык бөтен таләпләр буенча туры килә”, - диделәр лаборатория хезмәткәрләре. Генераль директорның урынбасары Айрат Аббазов әйтүенчә, биредәге хуҗалыклар өчен орлык заводында элиталы, югары уңыш бирә торган орлыклар җитештерүгә дә игътибар бирелә. Язын барлык хуҗалыкларда 9 мең тонна орлык реализацияләнгән. Быел көзен чәчү өчен 4 мең тоннага якын орлыкны үзебезнең районнан гына түгел, хәтта Санкт-Петербургтан, Мәскәүдән килеп алганнар.