Аракыны витринадан алыргамы?

Иҗтимагый палата әгъзасы Солтан Хәмзәев алкоголь продукциясен кибет витриналарыннан алырга һәм махсус меню буенча гына сатарга тәкъдим итә. Хәзерге вакытта алкоголь сатуда берничә альтернатив алым карала. Беренчесе – үз кассасы белән мөстәкыйль бүлек ачу, икенчесе – алкоголь секциясен касса зонасыннан һәм азык-төлек продуктлары рәтләреннән ераккарак урнаштыру һәм аннан продукцияне, бәяләмәсен ябыштырып, үтә күренми торган төргәктә алып чыгу. Әлеге адым алкогольны балалар күз алдында популярлаштырудан саклаячак, дип фаразлана.
Галия СИРАҖЕТДИНОВА, эшче:
- Бу адым балаларны гына түгел, олыларны да кирәк-сә-кирәкмәсә алкоголь сатып алудан саклаячак. Витриналардагы товар шулай ук реклама бит ул, күз күрә, ымсына, куллар үзеннән-үзе сузыла. Гомумән, аракы сату өчен аерым кибетләр ачсалар да яхшы булыр иде, югыйсә, ипигә дигән акчага да сыра сатып алучылар бар.
Рөстәм ХӘБИБУЛЛИН, Татарстан Республикасы Дәүләт алкоголь инспекциясенең Яшел Үзән территориаль органының әйдәп баручы белгече:
- Минемчә, аракыны, сыраны ширма артына яшереп кенә халыкның аппетитын тыеп булмый. Күбрәк средство спиртлы эчемлекләр куллануның авыр нәтиҗә-ләргә китерүен пропагандалауга, ягъни профилактика чараларына тотылсын иде. “Яшел елан”га каршы бөтен дөнья белән көрәшергә кирәк.
Рәшит МӨЛЕКОВ, мәдрәсә ректоры:
- Аракы, сыра, тәмәке кебек товарларны балалар күзе төшә торган урыннан ераккарак алуны бик хуплыйм. Балалар учреждениесеннән, уку йортларыннан тәмәке, аракы сатучы киоскларны фәлән метр якын урнаштырмаска дигән закон чыкты. Бу чираттагы профилактика чарасы булачак. Чыннан да, сатып алучы, бигрәк тә яшь-ләр аракыны, сыраны ипи, сөт белән берәттән сатып алырга күнегергә тиеш түгел.
Илдус ЗАКИРОВ, Россия Эчке эшләр министрлыгының Буа районы буенча полиция бүлеге начальнигы урынбасары:
- Тәмәкене сатып алучы күз угыннан алуны бик хупладым. Спиртлы эчемлекләрне аерым бүлеккә туплау гына түгел, аерым кибет ачып сату әйбәтрәк булачак. Ул кибетне иртәнге 10нан гына ачарга мөмкин, чөнки бу вакытка кадәр алкоголь сату бөтенләй тыела. Спиртлы эчемлекләр бигрәк тә балалар күз алдында тормаска тиеш. Тыелган җимеш татлы була, диләр. Шуңа күрә дә аларга ни өчен алкогольнең яшүсмерләргә сатылмавын аңлатып бирергә кирәк.