Спорт сөючеләрнең үз “казаны”

Физкультурачы көненә багышланган чаралар, район үзешчәннәре һәм Казаннан “Зөләйлә” төркеме башкаруында җырлар, үзебезнең “Гольфстрим” кызларының биюләре  белән дә үрелеп барды.
Бу көн спортта уңышларга ирешкәннәрне тәбрикләү өчен бер форсат. Сәхнә түренә иң элек Татарстан Республикасы Яшьләр эшләре,  спорт һәм туризм министрлыгы тарафыннан билгеләп үтелүче райондашларыбыз чакырылды. Азат Айзетуллов “Яшьлек” спорт мәктәбенең баскетбол буенча тренеры Илдус Җәләлетдиновка “Физик культура һәм спорт отличнигы”  билгесен, Әлши урта мәктәбенең физкультура укытучысы Владимир Ложковка, Түбән Наратбаштан Индус Вилдановка, Әлкидән Айдар Сәлаховка, Яңа Чәчкаптан Рәфис Садыртдиновка, “Яшьлек” спорт мәктәбенең волейбол буенча тренеры Наталья Зеленовага министрлыкның Мактау грамоталарын, шәһәрнең Р. З. Сәгъдиев исемендәге мәктәбе укытучысы Александр Давыдовка Рәхмәт хатын тапшырды. Муниципаль район башлыгының Мактау грамоталарына һәм истәлек бүләкләренә Воронеж өлкәсендә узган унынчы Бөтенроссия җәйге авыл спорт уеннарында  уңышлы чыгыш ясаган Флера Хәлимова, Чулпан Миначева, Марат Вәлиуллин, спортны үстерүгә зур өлеш керткән өчен “Яшьлек” спорт мәктәбе өлкән методисты Лилия Заһидуллина, "Батыр" спорт мәктәбенең самбо һәм дзюдо буенча тренер Альбина Вәлиуллина лаек булдылар. Яшьләр эшләре, спорт һәм туризм бүлеге начальнигы Ленар Вәлиуллин волейбол, армрестлинг буенча республика чемпионнарын һәм



спорт ветераннарын бүләкләде.

Спорт бәйгесеннән көчеңне күрсәтмичә кайтып китү дә дөрес булмас иде.  Монысына да урын бирелде.  Стартка беренче булып аркан тартучы егетләр чыктылар. Тиз арада өчәр кешелек сигез команда тупланды. Тамашачылар бар көчләренә кычкырып әле бер, әле икенче командага көч биреп тордылар. Аларның булышлыгы һәм үзләренең тир түгүләре белән беренчелекне Татар Буасы авыл җирлеге егетләре алды, икенчедә – “Буа газы”, өченчедә Югары Лашчы авылы командалары. Татар Буасы спортчылары башка ярышларда да бүләкләрне “эләктерделәр”  –  Сергей Майоров кул көрәшендә җиңде, ә командадашы Рөстәм  Төхфәтулин анда икенче, гер күтәрүдә исә беренче булды. Әхмәт электромеханика заводыннан Радмир Бәдретдинов ике төрдә дә өченче урын алды. Иң көчле беләклеләр арасында мәктәп уксысы да бар – 2 номерлы лицейдан Рафаэль Кәлимуллин гер күтәрүдә икенче нәтиҗә күрсәтте. Хатын-кызлардан армрестлингта җиңүчеләрне тамашачылар алдан ук билгеләп куйдылар. Флера, Чулпан һәм Гүзәл Шәрәпова әлегә үз араларына башкаларны кертмиләр, диләр. Көчле беләкле гүзәл затларыбыз урыннарны нәкъ шул тәртиптә бүлештеләр дә.
 - Көчем булса да, мәлен белеп бетермим, бу юлы катнашмадым әле, яхшылап әзерләнәм,- ди Буадан исемен әйтергә теләмәгән бер хатын-кыз. Шундый спортчылар арасында киләчәктә Сезне дә башкаларны да  күрергә насыйп булсын!