Буа муниципаль районы

Күперләр “хуҗасы”

2014 елның 22 августы, җомга

Күперләр “хуҗасы”

Буа шәһәрендә яшәүче Ренат Гыймадиев үзенең куркусызлыгы, үҗәтлеге белән кечкенәдән үк әти-әнисен, туганнарын шаккаттырды – русчаны чамалы гына белгән 13 яшьлек авыл малае берүзе Ташкент шәһәренә әтисенең сеңлесенә кунакка барып кайтты.
Төгәл адрес юк. Әтисе Га-рәф абыйның сеңлесе яшәгән урынны тасвирлап сөйләгәннәрне искә тө-шерә-төшерә байтак эзләде апасын. Өлкәннәрдән сорады, башын эшкә җик-те, тапты туганын. Бусагада агач чемодан тотып горур басып торучы энесен күреп, апасы башта бик гаҗәпләнде, аннары чиксез шатланды.
Студент – СССРның спорт
остасы
Менә шундый үткен холкы аркасында тормышта барлык уңышлар җиңел бирелде Ренатка. Мәктәптә укыганда ук район, республика олимпиадаларында призлы урыннар яулап, Казан авыл хуҗалыгы институтына имтихансыз керү мөмкинлегенә ия булды. Туган авылы Күл Черкене мәктәбендә, аннан М. Вахитов исемендәге гимназиядә, район күләмендә уздырылган спорт ярышларында да беренче өчлектән төшмәде Ренат. Институтның беренче курсында укыганда “Алтын көз” җиңел атлетика кроссында алтын, IV курста ирекле көрәш буенча Бөтенсоюз ярышларында көмеш медаль иясе булды һәм “СССРның спорт остасы” исеме алды. Бу югары дәүләт бүләген аңа ирекле көрәш буенча дөнья чемпионы Александр Медведь үзе тапшырды. Хәзер дә ул спортны ташламый: йөзү, ат спорты һәм көрәш бе-лән шөгыльләнә.
Ренат Гыймадиев югары уку йортын тәмамлап диплом алган көннән үк Буа машина төзү заводына җитәкче вазифасына – транспорт бүлеге начальнигы булып эшкә керешә. Озакламый инициативалы, уйлаганын ахырына җиткерүчән яшь белгечне “Татсельхозмонтаж” җәм-гыятенә алдан прораб, аннан өлкән инженер итеп куялар. Ул биредә шәһәр һәм авыллар халкын чиста су белән тәэмин итү системасын яңарту, районда беренче булып фермаларга заманча сөт үткәргечләр урнаштыру буенча саллы эш башкара. Ренат Гарәфовичның иң зур казанышы – “Фирма-гидромонтаж” район участогы начальнигы булып эшлә-гәндә районда үз проекты буенча төзелгән унбер күпер. Иң зурлары – 110ар метрлылары – Карлы елгасы аша Кырык Садак һәм Карлы авыллары янында. Алар хәзер дә сафта, халыкка хезмәт итә.
Гомер буе җитәкче “камытын” салмаган Ренат әле дә үз ролендә. Хәзерге көндә ул “Агроэнергосервис” чикләнгән җаваплылыклы җәмгыятенең генераль директоры. Аны кабул иткәндә оешманың 6 миллион сумнан күбрәк бурычы бар иде. Хәзер ул гөрләп яшәүче җәмгыять. Җитәкчесе Ренат Гарәфовичка аны торгызудагы, аякка бастырудагы уңышлары өчен “Татарстан Республикасының атказанган авыл хезмәткәре” дигән мактаулы исеме бирелде. Җитештерү комплектациясен, электр приборлары һәм күп төрле яктырту җайланмалары ясау, электр двигательләрен ремонтлау, электр белән монтажлау өлкәсендәге бай тәҗрибәсен уллары Рамил һәм Камил белән бүлешә. Камил җәмгыятьтә директор урынбасары, гаять җаваплы, булдыклы егет. Кече улы Фәнил дә әтисенә ярдәм итәргә атлыгып тора.

Ә яраткан ирләрен өйдә тәмле ашлар, сыйлы ризыклар белән әниләре Вахидә каршы ала. Бүген зур түгәрәк өстәл артында Ренат һәм Вахидә Гыймадиевлар гаиләсе гаять ишле: өч уллары, бер киленнәре, оныклары Әдилә, Рәзилә. Җитәкче, гаилә башлыгы исә бу көннәрдә 60 яшьлек юбилеен егетләрчә каршылый. Елларга бирешергә ярамый!

Оценить материал и/или оставить мнение

БАРЛЫК ЯҢАЛЫКЛАРНЫ УКУ