Күңел унҗидедә!

“Балкыш” республика фестиваленең зона этабы узды Буада. Район мәдәният сараенда иң  яшенә 55, иң өлкәненә 87 яшь булган “артистлар” сәхнәне яшьләрчә “дер” селкеттеләр.
Чираттагы фестиваль Бөек Җиңүнең 70 еллыгына багышланды. Иҗат бәйгесенә Идел аръягы районнарыннан 300дән күбрәк кеше килгән иде. Аларны муниципаль район башлыгы Азат Айзетуллов, ветераннар иҗтимагый оешмасының республика советы рәисе Хәбир Иштирәков сәламләделәр.
- Авыру-сырхауларны, тормыш мәшәкатьләрен читкә куеп, иҗатта дәрт, көч-куәт таба алуыгыз өчен рәх-мәтемне белдерәм. Рәхәт-ләнеп күңел ачыгыз, бүген сәхнә сезнеке, - диде Азат Айзетуллов.
Алдан килешенгәнчә, беренче булып сәхнә хуҗалары чыгыш ясады. Тамашачыларга Әлфия Галимова башкаруында Фатыйх Кә-римнең “Кыңгыраулы яшел гармун” шигырьле-җырлы композициясе бик ошады. Барысының да күз алдына поэманың төп герое –  өздереп гармун уйнаучы, сугышта яраланып, янәдән көрәш кырына чыгып ки-тәргә омтылучы батыр Фазыл килеп басты. Әлфия апаның төп геройның холкын, кичерешләрен залдагыларга оста җиткерүе Татарстанның халык артисты Шамил Әхмәтҗанов җитәкчелегендәге жюри әгъзаларына да ошады булса кирәк – алар да, тамашачыга кушылып, аның чыгышын көчле алкышларга күмделәр.
Адав-Толымбайдан Миңнебану Җаббарова республика кунакларын башкорт биюе белән әсир итте. 83 яшьлек әбинең сәхнәдә яшьләрчә  җитез хәрә-кәтләр ясавына тамашачы “Браво, афәрин” дип кычкырды.
Бабайлар да “яшәргән” – бәйрәмчә киенгән көр тавышлы Анатолий Сидоров, Равил Җамалетдинов, Равил Җәгъфәров туган җир-нең матурлыгына, аналар батырлыгына дан җырладылар. Бөек Ватан сугышының канлы вакыйгалары “Родник” вокаль ансамбленең, Лидия Гыймадиеваның җырларында тасвирланды. Тамашачылар башка артистларның да: “Гөлҗамал” фольклор ансамбленең, Факия Садыйкованың, Александр Юрлинның, Фәния Халикованың, Әлфия Хәйруллинаның, Сәрия Хәйруллинаның чыгышларын җылы кабул иттеләр.
Буалылар чыгышыннан соң старт апаслыларга бирелде. Көне буе диярлек барган тамашада барлык районы “артистлары” да сәхнә тотарга лаек икәнлекләрен расладылар. Соңыннан Хәбир Иштирәков фестивальнең барча катнашучыларына Мактау грамоталары тапшырды. Бәйгенең республика этабына узучылар исемлеге соңрак билгеле булачак.

Шамил Әхмәтҗанов, “Балкыш” фестиваленең жюри рәисе:
- Идел аръягы районнары үзешчәннәренең Буада җыелуы  тикмәгә тү-гел. Чөнки Буаны кече мәдәни башкала итеп саныйбыз. Сезнең артистларның республика бәй-геләрендә дә сынатканнары юк. Кыскача әйткән-дә, Татарстанда Буа районы шикәре белән генә түгел, ә талантлары бе-лән дә данлыклы.