Буа муниципаль районы

Рәхәтен күрегез, балалар!

2014 елның 29 августы, җомга

Рәхәтен күрегез, балалар!

Капиталь төзекләндерелгән социаль объектларны ачу дәвам итә – узган җомгада шәһәрдә “Ромашка” балалар бакчасы, Чуаш Киштәге авылы мәктәбе файдалануга тапшырылды.
“Ромашка”
33 елга “яшәргән”

Сабыйларның шатлыгын уртаклашырга муниципаль район башлыгы Азат Айзетуллов, Татарстан Республикасы Дәүләт алкоголь инспекциясе җитәкчесе Игорь Марченко, “Кощак” авыл хуҗалыгы предприятиесе” чикләнгән җаваплылыклы җәмгыятенең директорлар Советы рәисе, “Буа якташлыгы” җәмгыяте әгъзасы Ринат Гайзатуллин килделәр. Яңартылган икенче “өйләре” белән балаларны Азат Айзетуллов тәбрикләде:
- Районның иң зур балалар бакчасында төзекләндерү ике елга якын сузылды. “Бәләкәч” республика программасы кысаларында киләсе елга шәһәрнең Көнбатыш бистәсендә 140, Төньяк бистәсендә 80 урынга исәпләнгән яңа бакчалар төзеләчәк. Бу бакчага чиратларны сизелерлек кыскартырга тиеш, - дип белдерде ул.
Район башлыгының сүз-ләренә кушылып республика кунаклары да, бинаны төзекләндергән подрядчы оешма “ПМК-6” җәмгыяте җитәкчелеге дә изге теләкләрен җиткерделәр.
Якты, чиста, заманча материаллар кулланып ремонт-ланган коридорлар, төр-кем бүлмәләре, аш-су бүл-мәсе, спорт һәм музыка заллары гаҗәп зәвыклы итеп эшләнгән. 1981 елда хезмәт иткән бакчаны яңабаштан сүтеп ясаганнар сыман. Территориядә дә әйбәт үзгәрешләр күп: ачык төсле уен җиһазлары урнаштырылган һәм юл йөрү кагыйдәләрен өйрәнү өчен мәйданчыклар, яшел келәм сыман газонлы зона, брусчатка җәелгән, бизәкле тимер капка, урам ягында бакчага алып баручы асфальт юл – мондый матур һәм уңайлы балачак илендә сабыйлар, һичшиксез, бәхетле булырга тиешләр.
Белем алырга – матур мәктәпкә
Чуаш Киштәгендә укучылар кунакларны җыр, бию, шигырь белән каршы алдылар. Район башлыгы балаларны, укытучылар коллективын мәктәптә җәй буена барган төзелеш эшләренең төгәлләнүе белән тәбрик итте. Капиталь ремонтны башкаручы оешма – “Энергия Буа” җәмгыятенең җитәкчесе Таһир Арсланов та җирле халыкка коллегалары һәм үз исеменнән рәхмәт әйтте:
-Өч ай эчендә без сезнең белән туганлашып беттек. Ремонт барышында кайбер уңайсызлыклар булды, түздегез, ярдәм иттегез. Рәхмәт, сезгә, - диде ул.
Сыйныфка язу такталары сатып алу өчен 70 мең сум акча бирергә вәгъдә иткән һәм “Мәктәпкә җыенырга ярдәм ит!” акциясе кысаларында беренче сыйныфка баручы 6 балага букчалар алырга булышкан “Тахаръял” агрофирмасының генераль директоры Радик Гыйсмәтов та мәктәп коллективына яңа уку елы алдыннан котлау сүзләре җиткерде.

Оценить материал и/или оставить мнение

БАРЛЫК ЯҢАЛЫКЛАРНЫ УКУ