Буа муниципаль районы

Касыйм агай батырлыгы

2014 елның 29 августы, җомга

Касыйм агай батырлыгы

Күптән түгел Казан Кремлендә Бөек Ватан сугышы ветераннары музей-мемориалы мөдире Михаил Черепанов Казан шәһәре Сугышчан дан клубының Хәтер маршы активы белән Буа шәһәрендә булды. Ул хәбәрсез югалган саналган сугышчыларның якыннары белән очрашты, кайберләренә аларның һәлак булуы турында хәбәрләрне тапшырды.
Шул вакытта безгә, эзләүчеләргә, Иске Суыксу авылында яшәүче Рифкать Касыйм улы Хөсәенов әтисе Касыйм Шәрип улы Хөсәеновның Бөек Ватан сугышында нинди батырлыклары өчен орден-медальләр белән бүләкләнүен белешүне үтенеп мөрәҗәгать иткән иде. Без Касыйм Хөсәеновка командирлардан югары командованиегә җибәрелгән бүләкләү битләрен өйрәнеп, Рифкать Хөсәеновка “Байрак” газетасы аша ачык хат язарга булдык.
“Касыйм Хөсәенов 1918 елда Буа районының Иске Суыксу авылында туган. 1941 елның сентябрендә Буа хәрби комиссариаты аша Кызыл Армиягә чакырыла. Яшь сугышчы курсларын үткәннән соң егетне укчы коралны ремонтлау буенча курсларга укырга җибәрәләр. Аңа укчы коралны ремонтлау буенча оста дигән хәрби белгечлек бирелә.
“Батырлык өчен” беренче медален ул 1944 елның февралендә ала. Ул чакта 1нче Белоруссия фронтының 307нче укчы дивизиясенең 1023нче укчы полкы Гомель өлкәсендә авыр сугышлар алып бара. 1944 елның 25 гыйнварында сержант Хөсәенов Репище авылы өчен бәрелештә дошманның ут яңгыры астында сафтан чыккан пулемет белән минометны тиз һәм сыйфатлы төзәтә, полк моның рәхмәтендә алга хәрәкәт итә ала. Касыймның батырлыгын 1023нче укчы полкы командиры подполковник Робеженский шулай характерлый.
1944 елның апрелендә Касыйм сугышкан 307нче Новозыбково укчы дивизиясе Белоруссиядә хәлиткеч операциядә катнаша. Шул ук елның июлендә дивизия дәүләт чиген узып, Польшаны дошман басып алучыларыннан азат итү өчен сугышлар алып бара. 1945 елның февраль-мартында 1023нче укчы полк 911 тимербетон утлы нокта белән ныгытылган Хейльсбергны яулауда катнаша. 1945 елның февралендә Көнчыгыш Пруссиядә, Гросс-Хассельберг авылы тирәсендә безнең пехота һөҗүменә 20 минут кала пулемет җимерелә. Артиллерия һәм пулемет уты астында Касыйм Хөсәенов аны сафка бастыра. Пулеметны сынаганда ул дошман снаряды кыйпылчыгы тиеп авыр яралана. Батырлыгы өчен Кызыл Йолдыз ордены белән бүләкләнә.
Госпитальдән соң Касыйм туган авылы Иске Суыксуга кайтып, колхозда эшли. 1959 елда фронтта алган яраларыннан вафат була.”

Оценить материал и/или оставить мнение

БАРЛЫК ЯҢАЛЫКЛАРНЫ УКУ