Лосьоннан бәла

Кибетләрдә сатылучы гади лосьонның “яманаты” турында бер көндә берничә кешедән ишеттем. Берсенең ире шуны эчкәч тәмам котыра, нәрсә эшләгәнен белми, икенчесенең чүт үлемнән калган, кайсының йорт алдындагы чүплек савыты гел шуннан бушаган флаконнар белән тулган.


Адав-Толымбай авылында яшәүчедән дә редакция почтасына кибеттә сатылучы “фанфуриклар” эчеп, дөньясын онытып йөрүче-ләр турында хат килеп төште. Менә сиңа, шешәдәге 20 сумлык бит тиресен чистарткыч сыеклык халык дошманына әверелгән.
Иң беренче эш итеп Татарстан Республикасы Дәүләт алкоголь инспекциясенең Яшел Үзән территориаль органының контроль-инспекция бүлегенең белгеч-эксперты Рөстәм Хәбибуллинга сорау юлладык:
- Кибетләрдә андый лосьонны сатарга ярыймы?

Җавап тискәре булмады:
-Ул бит эчәргә түгел, биткә, тәнгә сөртергә дип сатыла. Әнә, шешәсе тышына “эч-кә кабул итү тыела” дип язылган, - ди белгеч.
Кызыксынып, бушаган “фанфурик”ны өйрәнәм. Шешә тышына, чынлап та, эчәргә ярамый, дип катгый итеп язылган. Җитештерүче болай тикмәгә кисәтми бит инде!

Менә кызык, кешеләр шул аңлашылмаган сыеклыкны сатып алалар һәм эчә-ләр?! Җәмәгать, ни өчен шулкадәр үз-үзеңә дошман булырга һәм күрәләтә гомерне кыскартырга? Хәер, дерелдәп торган куллары белән кибетчегә акча сузучы эчкечегә бу минутларда барысы да барыбер. Кибетче сатмаса, ялынып булса да, алачак. Әлеге “шешәдән” соң “башы китәме”, дәваханәгә эләгәме, гаиләсендә тавыш чыгамы, анысы турында уйларлык дәрәҗәдә булмый “фанфурик” сораучы.
Бәлки, сатучылар, кибет хуҗалары, бу бәлагә аек карарлар? Әлеге лосьон якынча 20 сум тора (эчкечеләрне шул арзанлыгы белән җәлеп итә дә), аннан табыш та өч тиенлек кенәдер. Гади лосьон гаилә-ләрдә тавыш чыганагына, котырткычка, агулаучыга әверелгәч, бәлки, чыннан да, аны алып та кайтмаска, киштәләргә тезмәскәдер? Ә матурланырга яратучылар гафу итәрләр, минемчә. Сезнең аңлы карашыгыз, намусыгыз хәзер бик кирәк.


Илсөяр ГАЯЗОВА.
Люция КРАСНОВА, табиб-нарколог:
- Әлеге “косметик лосьон” исеме астында сатылучы сыеклык аны эчкәндә мидә психик үзгәрешләр китереп чыгара. Кешенең үз-үзен тотышы сәерләнә. Организм агулана. Агуланулар үлемгә дә китерергә мөмкин.