Буа муниципаль районы

Батырларның исемен – китапка

2014 елның 3 декабре, чәршәмбе

Татарстан Республикасы ветераннар оешмасы төзелүгә киләсе елда 50 ел тула. Шул уңайдан оешма Бөек Җиңүнең 70 еллыгын каршылап, “Татарстан Республикасында ветераннар 50 ел сафта” дип исемләнгән китап нәшер итәргә җыена.
Бу хакта шушы көннәрдә Буага килгән Татарстанның хәрби хезмәт һәм сугыш ветераннары комитеты рәисе Әхәт Юлашев белдерде. Китапта Бөек Ватан сугышында катнашкан батырлар турында истәлекләр һәр районнан җыелган мәгълүматларга карап урнаштырылачак. Китапта Татарстаннан Бөек Ватан сугышында катнашкан һәр кеше турында мәгълүмат булачак.
- Якыннарыгыз, туганнарыгыз әти-бабаларыгыз берсе дә читтә калмасын дисәгез, алар турында истәлекләр җыюда актив булуыгыз сорала. Алар үткән данлы юллар турында (басмача яки кулдан язган) хатирәләр, гаилә архивларындагы фотосурәтләр, фронттан язган хатлар, төрле документлар нөсхәләре – барысы да безнең өчен кыйммәтле мәгълүмат,- диде ул очрашуда катнашкан ветераннарның башлангыч оешмалары җи-тәкчеләренә мөрәҗәгать итеп. Ул шулай ук аларның район халкына әлеге мәгълүматны җиткерүдә ярдәм итүләрен сорады.
Документларны озакка сузмыйча, Буа шәһәре, К. Маркс урамы, 70 йорт адресы буенча туган якны өйрәнү музеена яки Буа шәһәре Космовский урамы 31 йортта урнашкан ветераннарның район Советына (телефон: 3-31-39) китерергә була. Документларның барысы да кире кайтарылачак. Районыбызның яу батырлары китапта урын алсын дисәк, эзләник, материаллар туплыйк. Аларның барысы да моңа лаек.

Николай ДЕМЕНТЬЕВ,
Район ветераннар Советы рәисе.

Оценить материал и/или оставить мнение

БАРЛЫК ЯҢАЛЫКЛАРНЫ УКУ