Буа муниципаль районы

Шагыйрә бәхет тели

2014 елның 17 декабре, чәршәмбе

Якташ шагыйрәбез райондашларын тагын бер яңалыгы белән сөендерде – Гөлнур Айзетуллова (Гөлнур Айзат)ның бу көннәрдә “Аксу” студиясендә “Бәхетле бул!” дигән аудиоҗыентыгы дөнья күрде. Шул уңайдан Гөлнур Хәлил кызы белән әңгәмә кордык.

- Гөлнур апа , әлеге җыентыкны чыгару күңелегездә кайчанрак туды?
- Күп вакытымны укытучылык эшчәнлегем алып торса да, кешеләрне сөендерүдән тәм табам, күңелемә рәхәтлек алам мин. Башкаларның шатлыгын күрү хисе уйларымны сафландыра, матур шигырьләр, җырлар язу теләге арта. Күп дусларым соңгы елларда туган җырларымның бергә туплануын үтенделәр, үзем дә тормыш юлымны барлап карарга булдым. Аннары быел бит күркәм дата-олы юбилеем да көтеп тора, анда килүче, гомер бәйрәмемне минем белән бергә билгеләп үтүчеләр өчен матур бүләк булыр дип уйладым.
- Җыентык турында берничә сүз.
-Аудиоҗыентыгым төзелеше ягыннан яңалыгы белән дә аерылып тора. Студия җитәкчесе, композитор Рөстәм Сәрвәров белән киңәштек тә, җырлар тупланган диск белән бергә җырларның сүзләрен дә бергә китап итеп куярга булдык. Тагын бер яңалыгы – китапта минем иҗатымны яратучы дусларымның, тыңлаучыларымның матур фикерләре дә урын алган.
– Мондый җыентык әле беренче,-ди Рөстәм әфәнде дә. Шунысы күңелле:китапка кергән фикерләрнең географиясе киң – Оренбур, Ижау, Алабуга, Чаллы, Мәскәү, Әлмәт, Казан, Татарстан районнары...
- Альбомда кемнәр белән уртак җырларыгыз урын алган?
-Җыентыкка 62 җырымны сайлап алдык. Әле тагын берничә җыентыклык җырлар көтеп тора. Шамил Шәрипов, Оскар Усманов, Мөдәррис Газетдинов, Лилия Вахитова, Фәрид Мифтахов, Таһир Асылгәрәй, Адис Маликов, Ленур Зәйнуллин, Зарема Әюпова, Наил Сөләйманов, Сәйдәш Хәсәнҗанов, Риф Арслан, Чәчкә, Ирек Галиев, А.Еникиев, Р.Экажев, Айнур Айданов, Алсу Фазлыева, Рәхимә Арсланова, Тәслимә Низами һәм башкалар белән иҗат иткән җырларыбыз тыңлаучыларның күңеленә хуш килер дип уйлыйм. Дискта шулай ук сүзләрен дә, көен дә үзем иҗат иткән җырлар да урын алды. Ә исемен “Бәхетле бул” дигән җырымныкын алырга булдым. Кешеләргә һәрчак изге теләктә булдым һәм булачакмын да... Һәркем бәхеткә лаек! Киләчәктә әлеге җыентыгымны тәкъдир итү кичәсендә очрашулар көтеп калам. Җырларны Габделфәт Сафин, Айгөл Сагынбаева, Рөстәм Асаев, Ирина Сәйфуллина, Сиринә Зәйнетдинова, Гүзәл Җәләлева, Гүзәл Камалиева, Ирек Галиев, Эльмира Сөләйманова, Илсөя Бәдретдинова, Бәширә Насыйрова, Рафаэль Латыйпов, Илсаф һәм башка күп җырчылар башкара.
- Рәхмәт сезгә!

Оценить материал и/или оставить мнение

БАРЛЫК ЯҢАЛЫКЛАРНЫ УКУ