Буа муниципаль районы

Мин бәхетле

2014 елның 31 декабре, чәршәмбе

Шабашкада йөреп, куллар сөялләнгәнче кирпеч, измә ташыганда ручка-кәгазь тотып, эш кушып торучы прораб иң дәрәҗәле һөнәр иясе тоела иде Феридкә. Шул чакта, сигезенче сыйныфны тәмамлаган мәлдә, егетнең башына төзелеш буенча югары белем алу уе кереп оялады.
Һичьюгы прораб булырга!
Ул туып-үскән Батыр районы, Татар Согыты авылында төзелеш мәлен бел-мәгән ир-ат юктыр ул. Ферид ике дә уйламыйча Чабаксар төзелеш училищесына аттестат тапшырды. Аннары училище Кызыл дипломын тотып Казан инженерлык-төзелеш институты ишеген шакыды. Вуз эшкә билгеләве буенча кайткан “яңа пешкән” инженер-төзүче мишәр егете таныш түгел Буада, 7 номерлы ПМКда беренче хезмәт дәресләре узды. Җиңел булмады. Үзе беркемне белми, аны беркем белми. Ләкин моның өчен вакыт кына кирәк булып чыкты: оешма остасы Ферид Минналиевичның эш-ли белү сәләтен буалылар югары бәяләде. Ул арада районда яңа спирт заводы төзелешен башладылар. Сазлыклы ялан җирдә предприятиенең беренче казыгы аның җитәкчелегендә утыртылды. Салиховны район хакимияте каршындагы капиталь тө-зелеш идарәсенә баш инженер итеп күчергәч тә иртәнге “летучкалар” предприятие биналарын монтажлау мәшәкатенә багышланды. Завод коруның 80 процент эше аның кул астында башкарылды.
Соңгы уналты елда Ферид Салихов 5 номерлы ПМК рулендә. Нык тота. Предприятие район төзелешен-дә саллы урын тота.
- Буада, күрше районнарда үзебез салган объектларны бер санап чыгарга исәп бар, вакыт җитми әле-гә, - дип көлә җитәкче. Хә-ер аның өчен һәрвакыт беренче урында сан түгел, сыйфат булды. Кешеләр рәхмәт әйтерлек булсын, дип эшләргә өйрәтә ул коллективын. Ферид Минналиевич нечкә психолог та, кулына кирпеч тә тотып карамаган кешедә төзү остасын күрү сәләте бар ан-да. Табигый “оеткы” салынган икән, белмәгән кешене дә өйрәтеп була, дигән фикердә ул. Коллективта осталыкны, дисциплинаны хөрмәт итә. Эленке-салынкы йөрүчеләр ПМКдан ерак йөрсеннәр, ди.
“Улым – уң кулым”
Дөрес, бүген тормыш бай, мул, проблемасы да шулкадәр күп. Төзелештә көн-дәшлек зур, заманасы ыгы-зыгы, коллективны эшле һәм икмәкле итү дә аерым бер зирәклек сорый. Күптән түгел Ферид Минналиевич үзенең гаҗәп көчле “уң кулы” барлыгын тойды – улы! Әтисе төсле төзелеш вузын тәмамлаган Фаил предприятиенең финанс хәлен ныгыту йө-зеннән утильләштерелгән тузган шиннарны эшкәртү цехы ачарга тәкъдим итте. Яңача уйлаучы, заманча фикер йөртүче улының сүзләрен ата игътибарсыз калдыра алмады: бу – идея! Идел аръягында мондый эш белән шөгыльләнүче юк, экологияне саклауга ярдәм, иң мөһиме – вакланган резинаны отышлы урнаштырып булачак. Хет чимал рәвешендә, хет әзер продукция итеп. Сорау зур. Әтиле-уллы яңа планны өч ай өйрәнделәр. Бүген ПМКда цех төзелеше башланды.
Ферид әфәндене кызы Эльмира да сөендерә, Казан финанс-икътисад институтын тәмамлап, әйбәт кенә белгеч булды, хәзер, әнә, кияү белән искиткеч онык бүләк иттеләр хатыны Сиринә белән икесенә.
Ферид Минналиевичка соңгы сорауны бирәм:
- Сез үзегезне Буаныкы итеп саныйсызмы?
- Күрше республика егете-нә Буада үз юлымны ярырга туры килде. Көчем дә, эшләрем дә, гаиләм дә, дусларым да шунда. Туган авылымда гомер кичерүче әнием Гөлҗиһанның исән булуы, мине хәер-фатыйхасында яшәтүе белән дә мин бик бәхетле кеше. Мин – Буаныкы. Яңа елның беренче көннәрендә шунда Алтын юбилейны каршылыйм, - ди әңгәмәдәшем. Әйе, киләсе ел юбилейлар елы – ПМКга алтмыш тула, аның 16 еллык алыштыргысыз җитәкчесенә, Татарстанның атказанган төзү-чесе Ферид Салиховка – 50! Үткәннәрне барлап, яңа планнар корыр егет чак!

Оценить материал и/или оставить мнение

БАРЛЫК ЯҢАЛЫКЛАРНЫ УКУ