Буа муниципаль районы

“Барыбер табиб булыр идем”

2015 елның 17 апреле, җомга

Сания Вәлиева кечкенә чакта авырган саен үскәч табиб булам да, үземне дә, башкаларны да дәвалыйм, дип уйлый иде. Кыз балачак хыялына хыянәт итмәде: алдан педиатр, аннан районда бердәнбер фтизиатр булып 30 ел хезмәт итте.
Туган ягына да тугры калды кыз – Казан медицина институтын тәмамлагач, юллама алып Буага кайтты. Дипломын кулына кысып тотып, дәваханәгә килде, дулкынланып баш табиб Нил Фәйзетдинов кабинетына керде.
- Безгә педиатрлар бик ки-рәк, үзебезнең район кызы да икәнсең, - дип, колач җәеп диярлек каршылады ул аны. Икенче көнне яшь табиб Сания Вәлиеваның кабинеты балалар чыр-чуы белән тулган иде. Шул көннән башлап ул нәни пациентларның сәламәтлеге, ә кайчакта гомере өчен көрәште. Шундый бер очракны гомердә дә онытмый ул. Кичен бер баланың каты әйбер йотканлыгын хәбәр иттеләр. Өйдән халатын эләктереп ничек дәваханәгә чыгып йөгергәнен үзе дә абайламады. “Ашыгыч ярдәм” бүлегендә сулыш ала алмаудан тән-нәре зәңгәрләнгән сабыйны кулларына алып, хәле беткәнче беренче медицина ярдәме күрсәтте. Бала тансык беренче сулышны алып, күзләрен ачкач кына үзенең дә йөрәге күкрәген-нән чыгып төшәрдәй итеп типкәнен сизде. Шатлык, горурлык хисләре генә тынычландырды аны.
Ә шулай да Сания Равиловнаның хезмәт юлының саллы өлеше балаларны түгел, ә өлкәннәрне дәвалауга багышланды. Дәваханәдә фтизиатр кабинеты ачылгач, монда эшләү өчен җитәкчелек берсүзсез аның кандидатурасын тәкъдим итте. Районда бердәнбер, берничә дистә ел буена аны хәтта отпуск ялында да алыштырырга белгеч булмый. Күпме кешене туберкулездан терелтте ул.
- Арымадыгызмы, барысына да кул селтисе килгән вакытларыгыз булмадымы? - дип сорыйм әңгәмә-дәшемнән.
- Беләсезме, юк. Мин булмасам, кем? Ходай тагын бер гомер бирсә, кабат табиб һөнәрен сайлар идем. Күбрәк психология фәнен үзләштерер идем, - ди ул картлар һәм инвалидлар өчен интернат-йортында эшләү елларын да искә алып.
Менә шулай табиб-фтизиатр армый-талмый юбилейлы 55нче язына атлады. Ә алда дөрләп яшисе көннәр бар – аның ярдәменә мохтаҗ пациентларына, яраткан тормыш иптәшенә, балаларына, оныкларына бик кирәк әле ул.

Оценить материал и/или оставить мнение

БАРЛЫК ЯҢАЛЫКЛАРНЫ УКУ