ЯҢАЛЫКЛАР


15
июнь 2020 ел.
дүшәмбе

Буа районына азык-төлек җыелмаларының өченче траншы керде. «Помощь рядом! Ярдәм янәшә!” акциясе кысаларында авыл җирлекләре башлыклары да актив һәм оператив катнаша. Без Кыят авыл җирлеге башлыгы Евгения Коруновадан җирлекнең күпме кешесе азык җыелмаларын алачак һәм нинди категориягә бирелгәне белән кызыксындык. "Безнең җирлектә әлеге категориягә кергән 26 граждан бар. Алар барысы да, чыннан да, мондый ярдәмгә мохтаҗ. Әлеге азык җыелмаларын алучылар категориясен искә төшереп үтәсе килә: яшәү минимумыннан түбәнрәк булган һәм сигез яшьтән өлкәнрәк балалар тәрбияләнүче аз тәэмин ителгән гаиләләр; ата-аналары алимент түләмәгән балалар; 65 яшьтән өлкәнрәк, пенсияләре яшәү минимумыннан түбән булган ялгыз яшәүче өлкән кешеләр; социаль куркыныч хәлдә булган гаилә балалары; опекуннар түләүсез нигездә тәрбияләнүче балалар, шулай ук пандемия шартларында зыян күргән үзмәшгульләр, шәхси эшмәкәрләр. Менә инде өченче транш пакетлар тарату үтәлде, хәзер без дүртенче көтәбез. Җыелма составына кирәкле барлык продуктлар керә. (ярмалар, макароннар, май, чәй, тушенка, куертылган сөт, вафли, кәнфит, консервлар һ.б.) Алучылар бик канәгать һәм рәхмәт сүзләрен генә әйтәләр”-, диде ул

"Заря" агрофирмасында бу эш оешкан төстә бара. Хуҗалыкта сенаж һәм печән әзерли башладылар. Баш зоотехник Раил Идрисов әйтүенчә, кышлату өчен 22 мең тонна сенаж, 24 мең тонна силос, 3000 тонна печән, 5000 тонна салам әзерләргә кирәк булачак. Агрофирма дирекциясе басуда эшләүчеләр өчен барлык шартларны да тудырды. Яшел массаны кырдан азык базаларына чыгаруга 15 берәмлек техника җәлеп ителгән. Быел җәй яшел масса әзерләү өчен уңайлы булды. Зарялылар җитәрлек азык запасы булдырырга өметләнәләр. Иван Яковлев "Заря" агрофирмасында механизатор булып 30 ел эшли. Хәзерге вакытта КПУ-3,6 агрегатында күпьеллык үләннәр чәчүгә туфрак әзерләү белән мәшгуль. Тырыш тракторчы нәтиҗәле хезмәткә бөтен көчен куя.

“Җәйнең бер көне - ел туйдыра” ди халык. Июнь ае хуҗалыкларда кышкы терлек азыгы әзерләү чоры. Бүген Буа муниципаль районы җитәкчесе Ранис Камартдинов «Заря» ҖЧҖ, «Дружба» ҖЧҖдә сенаж салу эшләренең барышы белән танышты. "Заря" агрофирмасында кышлату өчен 22 мең тонна сенаж, "Дружба"да 25 мең тонна сенаж саласы бар. Ранис Камартдинов бригадаларның эзлекле эше , сенаж ташу һәм трамбовкалау шартларын карады. Ул шулай ук басуларны, чүп үләннәренә, корткычларга һәм авыруларга каршы эшкәртү эшләре барышы белән танышты. Соңрак район җитәкчесе Ямбулат авылында сөт-товар фермасына тукталды һәм андагы төзекләндерү эшләре белән кызыксынды. Шулай ук Буа районы агрохим хезмәтенең доломит оны чыгару буенча эшнең оештырылуын карады.


13
июнь 2020 ел.
шимбә

Су коену чоры башлану һәм җәйге чорда сулыкларда балигъ булмаган балаларның үлеменә юл куймау максатыннан, Буа муниципаль районының балигъ булмаганнар эшләре һәм аларның хокукларын яклау комиссиясе балигъ булмаган балаларның ата-аналарына табигый сулыкларда үз-үзеңне тоту кагыйдәләрен тайпылышсыз үтәүне һәм аларның бозылу нәтиҗәләрен истә тотуны сорап мөрәҗәгать итә. Әлеге кагыйдәләрне искә төшереп, Сез балаларыгызның иминлеген, суда булган бәхетсезлек очракларын кисәтәчәксез.

Сулыкларда контрольсез коенучы балалар яныннан үтмәгез! Аларны сулыктан китергә үгетләгез! Суда бәхетсезлек очракларын булдырмас өчен ата-аналарга балаларның кайда уйнауларын һәм йөрүләрен ныклы контрольдә тотарга киңәш итәбез.

Балаларыгызның сәламәтлеген һәм тормышын куркыныч астына куймагыз!

Балалар турында кайгырту, аларны тәрбияләү – ата-аналарның тигез хокукы һәм бурычы.

Безнең барыбыз өчен дә иң мөһиме-теләсә кайсы яшьтәге балалар! Җәмгыятьнең, гомумән алганда, ата-аналарның төп бурычы- балалар өчен, аларның тормыш-көнкүреше өчен куркынычсыз шартлар тудыру. Кызганычка каршы, җәйге күңелле ял еш кына балалар фаҗигаләре белән тәмамлана. Узган җәйдә кечкенә бала белән Ырынгы авылында фаҗигагә китергән бәхетсезлек очрагы булган иде. Бәхетсезлек очракларының барысы да диярлек балалар кызыксынуы, тәҗрибәсезлеге белән бәйле, ә янәшәдә менә фаҗигане булдырмый калырга сәләтле олы кеше булмавы кызганычка әверелә.

Пенсия фондының территориаль идарәсеннән алынган мәгълүматларга караганда, Буа районында өч яшьтән алып 15 яшькә кадәрге 5 меңнән артык балага бер тапкыр бирелә торган түләүләр алынган. Түләүләрнең гомуми суммасы 72 млн. сумнан артык. Пенсия фонды хезмәткәрләре, кыскартылган составта эшләсәләр дә, ил Президенты куйган бурычны кыска вакыт эчендә башкарып чыктылар. Документлар белән эшләү иртәдән төнгә кадәр барды, тәүлек эчендә ике меңнән артык гариза эшкәртергә туры килде. Исегезгә төшерәбез, түләү өчен гаризалар агымдагы елның 1 октябренә кадәр кабул ителәчәк.

РФ Конституциясенә социаль юнәлешле төзәтмәләр Россиядә гаилә үсешенә уңай йогынты ясаячак һәм илдә гаилә тәрбиясе өстенлеген ныгытачак. «Татар-информ» МА ТР Иҗтимагый палатасы рәисе Зилә Вәлиева әнә шундый фикер белдерде.

Буада күп фатирлы йортларда яшәүчеләр Россия көнен бәйрәм иттеләр. Буада Россия көнен Ринат Рәхмәтуллин катнашында концерт программасы белән билгеләп үттеләр. Гагарин урамындагы 28нче йорт ишегалдында Россия көне чын бщйрщм рухында узды. Әлеге микрорайондагы күп катлы йортлар "Космос" территориаль иҗтимагый үзидарәсенә карый. Аның җитәкчесе Анна Никонорова барлык йортларда яшәүчеләргә көтелгән бәйрәм турында алдан хәбәр итте. Мәдәни үсеш үзәге көче белән зур концерт әзерләнде. Якташыбыз, танылган җырчы Ринат Рәхмәтуллин җырларын тыңлап, халык биеде, күңел ачты. Балалар өчен конкурслар оештырылды. ТҖҮ җитәкчесе Анна Никонорова бәйрәм белән котлады, ишегалларын төзекләндерүдә актив катнашучы күпфатирлы йортларда яшәүчеләргә бүләкләр тапшырды. Бәйрәмгә килгән кунакларга Россия флагы тасмалары таратылды. Өлкән яшьтәге кешеләрнең кайберләре бәйрәмне фатир балконнарыннан күзәттеләр. Активлары үз балконнарына Россия һәм Татарстан әләмнәрен элделәр.

Шушы көннәрдә Буа районына азык-төлек җыелмаларының өченче траншы кайтты. Исегезгә төшерәбез, #Ярдәмянәшә! #Помощьрядом акциясе Татарстан Президенты Рөстәм Миңнеханов инициативасы белән старт алды һәм республиканың барлык районнарын да колачлады. Азык-төлек җыелмаларын алучылар исемлеге Татарстанның Хезмәт, мәшгульлек һәм социаль яклау министрлыгы тарафыннан билгеләнде. Аңа 6 категория гражданнар керде. Бу: - керемнәре яшәү минимумыннан түбән булган 65 яшьтән өлкәнрәк ялгыз яшәүче пенсионерлар; җан башына уртача кереме яшәү минимумыннан түбәнрәк булган, гаилә составында 8 яшьтән өлкәнрәк балалары булган гаиләләр; җан башына уртача керемле яшәү минимумыннан түбәнрәк булган балалы гаиләләр; опекага һәм попечительлеккә бурычлары түләүсез нигездә башкарыла торган гаиләләр; социаль куркыныч хәлдә булган гаиләләр; әти-әниләре коронавирус таралу шартларында аеруча зыян күргән тармаклардагы балалы үзмәшгульләр яки шәхси эшмәкәрләр. Безнең районда бу исемлектә -727 граждан.

Татарстан «Россия тәрәзәләре» Бөтенроссия акциясенә кушылды, аның кысаларында 12 июньгә бөтен ил буенча йорт һәм биналарның тәрәзәләре бизәлә. Буа районы да читтә калмады: биналар тәрәзәләрендә-Россиягә багышланган рәсемнәр һәм язулар беркетелде. Акциягә теләгән һәркем кушыла ала.


ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International