Расписаниедә – хезмәт дәресе

Мәктәпләрдә укучыларны хезмәткә өйрәтүгә элек игътибар зур иде. Бу һаман да шулаймы? Әлеге язмада шуны ачыкларга уйладык.

Буа муниципаль районының мәгариф идарәсе начальнигы Илнар Абзалов белдерүенчә, мәктәпләрдә технология дәресләрен алып бару өчен кирәкле җиһазлар өлешчә яңартылып тора. Мәсәлән, ике ел элек ир-балалар өчен металл эшкәртү сыйныфлары кайтартылды, ә узган ел кызлар яңа тегү машиналы булдылар. Беренчесен сатып алуга республика бюджетыннан акча бүлеп бирелсә, соңгысы – 160 данәдә – район администрациясе бүләге. Ир балаларга технология дәресләрен укытучыларның район методика берләшмәсе җитәкчесе Фәнис Гыйззәтуллин исә яңа кайтарылган җиһазларны аз, дип саный. Металл эшкәртү сыйныфы барлык мәктәпләргә дә җитмәде. Калганнар эксплуатация срогы чыккан иске җиһазларда эшләргә мәҗбүр. Өстәвенә барысында да материалга кытлык кичерәләр. Авыл җирендә артып калган такта, тимер кисәкләре табу зур проблема булмаса да, шәһәрлеләр өчен “каты чикләвек”. Укучыларның күбесе материалларны өйдән алып киләләр. Алар булган “байлыкны” эшкә җигеп, агачтан сыерчык оялары, җим савытлары,  көрәк, сәнәк саплары, металл соскычлар, әрҗәләр, балык кармаклары ясыйлар, таләп ителсә, ишек алды себерү, кар чистарту эшен дә башкаралар. Агач, металл белән эшләргә өйрәтү белән бер-гә һәр уку чирегендә “Өй мәдәнияте” дигән бүлек тә укыту программасына кертелгән. Анда булачак хуҗалар көнкүрештә кирәк булган эшләргә төшенәләр. 

Югары сыйныфларда ир-балалар да, кызлар да, моңарчы алган белемнәренә таянып, яңа технология кулланып, бизнес-план, төрле проектлар эшлиләр. Ләкин аларның эчтәлеге аерыла. Кызлар пешерү, тегү, чигү һәм өй эшләренә өйрәтеләләр. Технология дәресләрен укытучыларның район методика берләшмәсе җитәкчесе Люция Шәйдуллина әйтүенчә: “Кызлар өчен аш-су, тегү, хуҗалык алып бару буенча бирелгән биремнәр 5тән алып 7 сыйныфка кадәр катлаулана гына бара. Югары сыйныфларда алар төрле милләтләр кухнясын үзләштерергә, берничә үлчәмдәге киемнәр тегәргә тиеш булалар. “Егет кешегә җитмеш төрле һөнәр аз, дисәләр дә, кызларга да артык кәсеп комачауламый “– ди Люция Хатыйп кызы.

Мәгариф идарәсе начальнигы әйтүенчә, укучылар, елдагыча, яшелчә үстерү белән шөгыльләнәчәк. Барлык мәктәпләрдә дә яз саен теплицалар төзекләндерелә. Авылларда күбрәк уңыш алу өчен иясез йортларның бакчаларына да төрле яшелчәләр утыртылачак. “Максат – мәктәп тәмамлаган һәр укучы күп төрле һөнәр иясе булырга тиеш. Тормышта үз юлыңны табу өчен шөгыльнең берсе дә артык булмый”, - диде ул.