Кадастр кварталны киңәйтү өчен теләк кенә җитми

Территориаль кадастр бүленеше челтәрен үзгәртергә теләүчеләр күп. Муниципалитетлар кадастр палатасына кварталлар чикләрен күчерүне сорап мөрәҗәгать итәләр. Әмма монда теләк кенә җитми, ул закон нигезендә эшләнергә тиеш.

Торак пунктларның чикләрен үзгәртергә теләүнең сәбәпләре күп төрле булырга мөмкин, әмма практика иң киң таралганының берсе төзелеш мәйданнарына ихтыяҗ булуын күрсәтә. Шәхси торак төзелеше өчен торак пункт чикләрендәге җир генә яраклы. Ә планлаштырылган яңа төзелеш авыл хуҗалыгы билгеләнүендәге җирләргә керсә? Бу очракта җир категориясе нигез салу өчен җитди киртәгә әверелә. Җирле үзидарә органнары алдына җирнең статусын үзгәртү мәсьәләсе кискен килеп баса. Моңа кадәр туры килүче карар Министрлар Кабинеты тарафыннан кабул ителә иде. Быелның гыйнварыннан башлап – генераль план нигезендә. Ә алар бүгенге көндә барлык муниципаль берәмлекләрдә дә юк. Ә бәлки кварталның чиген күчереп куяргадыр, дип фикер йөртә урындагылар. Үз артыннан җирнең туры килүче категориясен дә ияртеп торак пунктларның чикләре күчәчәк, дигән фикер эзлекле дә кебек...Юк, җәмәгать! Кадастр кварталы – акбур белән квадратларга бүленгән асфальт түгел. Барысы да күпкә катлаулырак. Татарстан Республикасы буенча кадастр палатасы директоры урынбасары Ләйсән Гатауллина аңлатуынча, торак пунктлар чикләрен генераль планга (иң беренче чиратта аның булуы кирәк) үзгәрешләр кертеп кенә үзгәртеп була. Әлеге норма закон тарафыннан билгеләнгән. Аныкланган чикләр кадастрда барлыкка килсен өчен генераль планнан өземтәне һәм җир төзелеше объекты картасын (планы) – торак пункт чикләре координатларын билгеләү буенча эшләр нәтиҗәсен китерергә кирәк. Жирлектәге чикләр турындагы мәгълү-мат кадастрдагысы белән туры килмәү аркасында үзгәртүләр таләп ителгәндә дә эшләр  алгоритмы шул ук. “Эш шунда ки, кайчандыр торак пунктлар чикләре инвентарьлаштыру материаллары нигезендә исәпкә алына иде. Ә җирлекләр чикләре буенча кадастр кварталлары чикләре билгеләнде. Еш кына алар туры килә. Аңлашылмаучанлык та, бәлки, шуңа бәйледер. Күрәсең, муниципаль берәмлекләр белгечләре квартал  чикләрен күчерү җиңелерәк, дип уйлый торганнардыр: нәтиҗәсе шул ук, ә генплан белән проблема юк. Бу дөрес түгел. Хәзер генплан – барысына да баш. Җирлекләр чикләрен үзгәртү кадастр бүленешне үзгәртүгә нигез була алмый. Моннан тыш, соңгылары Россия Федерациясе Росреестры белән килешү буенча гына кертелә ала. Һәм моның өчен саллы сәбәпләр кирәк. Юл бер генә – закон буенча эшләргә”, - ди Л. Гатауллина.

Бүгенге көнгә күчемсез мөлкәтнең дәүләт кадас-трында, генпланнар белән туры китереп, бары 18 торак пунктның гына чикләре күрсәтелгән. Ә моны барысы да эшләргә тиеш. Бу җирлекләрнең үзләренең территориаль куркынычсызлыгы өчен дә кирәк. Торак пункт чикләрен үзгәртү процедурасына кагылышлы тагын бер мөһим момент – кадастрда әлеге мәгълүматлар исәпкә алынганнан соң да эш дәвам итә. Чиккә кертелүче яисә аннан төшереп калдырылучы участокларның характеристикалары – урнашуы һәм җир категориясе үзгәрү. Әлеге мәгълүматлар да теркәлергә тиеш. Кадастр палатасына исәп алып бару өчен тиешле документлар электрон рәвештә китерелә. 

Белешмә өчен: кадастр бүленеш – ул илнең тулаем территориясен территориаль берәмлекләргә бүлүче бердәм челтәр. Кадастр округлар территорияләре, кагыйдә буларак, Россия Федерациясе субъектлары территорияләре белән тәңгәл килә. Мәсәлән, татар кадастр округы. Ул кадастр районнарга бүленә. Аларның чикләре нигездә муниципаль районнар һәм шәһәр округлары чикләре белән туры килә. Кадастр районы кадастр кварталларга бүленә, аларда җир участокларына кадастр номерлары бирелә.