Килограммын – 12 сумнан

Муниципаль район башлыгы Азат Айзетуллов тәкъдиме белән  сөт җыючылар халыктан бу продукциянең килограммын 12 сумнан да ким булмаган бәягә кабул итәргә килештеләр.  

- Сыер асраучы аның сөтен азмы-күпме табышка өмет итеп тапшыра. Әлегә сөтне төрле җыючы төрле бәядән кабул итте. Кайсы килограммын 10-11 сумнан, кайсы 8-9 сумнан алды. Кибеттә сөтнең литры 35-40 сум торганда, бу гадел түгел, - диде муниципаль район башлыгы урынбасары Валерий Егоров. 

Хәзерге вакытта районда шәхси хуҗалыкларда 3088 баш сыер асрала. Сөт җыю белән 7 эшмәкәр шөгыльләнә.  Тәтеш районыннан килеп алып китүчеләр дә бар. Хуҗалыклардан җыелган сөтнең иң күбе  май-сыр комбинатына тапшырыла. Анда тәүлеккә кабул ителгән 8 тонна продукциянең 3 тоннадан күбрәген сөт җыючы Мөнир Сәйфетдинов китерә. 

- Июнь аенда, сөт күп чакта, халыкка аның килограммы өчен 9 сум, июльдә 10 сум түләдем. Көзгә таба сөт азая, кыйммәтләнүе дә гаҗәп түгел. Алга таба килограммына 12 сумнан түләячәкмен, - ди Мөнир абый. Иске Тинчәле, Яңа Шәйморза, Иске Суыксу Выселкасы авылларына хезмәт күрсәтүче эшмәкәр Фәнис Азизов продукцияне Чурак авылындагы “Сливки” җәмгыятенә тапшыра. Ул апрель-май айларында һәр килограмм сөт өчен 9 сум 50 тиен түләгән. 20 июльдән бәяне 11 сум 50 тиенгә күтәргән. 

- “Сливки” җәмгыяте сөтне килограммын 14 сумнан кабул итте, ә августның 20сеннән бәяне тагын 50 тиенгә күтәрде. Минем халыктан 12 сумнан кабул итү мөмкинлегем бар, - ди Фәнис. Вольнистан, Ташкичү авылларында сөт җы-ючы эшмәкәр Әсфир  Хисаметдинов көн саен 1,5 тонна җыелган продукцияне Чуашстанның Кыр Бикшиге авылындагы сөт җыючыга илтә. Ул да августтан  сөтне 12 сумнан  кабул итәргә каршы түгел.