Буа муниципаль районы

Табиб янына – терминал аша

2014 елның 30 мае, җомга

Соңгы вакытта район үзәк дәваханәсе поликлиникасына килүчеләр көтелмәгән яңалык белән очраша – кабул итүче табиб кабинетыннан аларны, талон алырга кушып, кире боралар. Бу рәсмилек сәламәтлек саклау системасында кәгазьдәге документлардан арынып, авыруның мәгълүматларын электрон базага туплауга керешүгә бәйле.
Ничек
талон алырга?
Табиб кабул итүенә терминал аша керү күп кешедә ризасызлык уята, ник аптыраталар, янәсе. Әлегә тәртип шундый, табибка ярдәм сорап килүче поликлиниканың беренче катында регистратура каршында куелган терминалдан талон алырга тиеш. Кемгә үз участок табибына, кемгә – гинекологка, кемгә – педиатрга, кемгә стоматологка кирәк (әлегә шул юнәлешләрдәге докторларга). Ә тар белгеч-ләргә сезне участок гомумтабиблары җибәрәчәк. Терминал янында махсус кизү торучы медицина хезмәткәре сезгә талон алу өчен дөрес төймәләргә басарга булышачак. Терминал биргән кәгазьдә кабул итүнең вакыты, табибның һәм пациентның исем-фамилиясе ачык күрсәтел-гән. Талон кулыгызда булгач, сезне тәгаен кабул итәчәкләр. Талон буенча кабул итү аралыгында әлегә тере чират та гамәл-дә. Талон бирү аппараты каршында зур чиратлар җыела башласа, әлегә кабул итүне теркәү өчен регистратурага да мөрәҗә-гать итәргә ярый.
Өйдән язылу –
уңайлырак
Электрон системаның халык өчен бик зур плюсы бар – табиб кабул итүгә ике атна алдан өйдән торып та язылырга була. uslugi.tatarstan.ru электрон сайтына кереп кәрәзле телефоныгыз номерын җы-еп, теркәлергә кирәк. Шәх-си кабинетыгызда үзегез турындагы мәгълүматны: исем-фамилиягезне, туган елыгызны, җенесеңне язарга һәм мәҗбүри медицина страховкалавы полисы номерын кертергә ки-рәк. Теркәлгәннән соң дәү-ләт хезмәт күрсәтүләре порталының төп битендә сәламәтлек саклау “тәрә-зәсендә”, бер-бер артлы кабул итүгә һәм Татарстан Республикасы табибларына кабул итү юлларына басарга. Полис мәгълү-матларын саклап, Буа шә-һәре поликлиникасын табасыз. Әгәр дә бу юллар ачылмаса, сезнең турындагы мәгълүматлар әлегә дәваханәнең гомуми базасына кертелмәгән. Моның өчен документлар белән регистратурага мөрәҗә-гать итәргә кирәк. Хәзерге вакытта моның белән участок шәфкать туташлары да шөгыльләнә. Базада булсагыз табибларның кабул итү графигы чыгачак һәм буш вакытны сайлый аласыз. Аңлыйм, өлкәннәр өчен өйдән язылу процедурасы катлаулырак булачак, монда оныкларыгыз ярдәмгә килергә мөмкин.
Кабул итүгә күпме вакыт кирәк?

Киләчәктә электрон система кәгазь документларны бөтенләй кысрыклап чыгарачак, ягъни бүгенге авыруларның медицина карталары әйләнештән чыгачак. Тик моның өчен һәр кешенең мәгълүматы электрон базага тупланып бетәргә тиеш.
Әлегә бер табибка кабул ителүгә көнгә 16 талон бирелә. Беренче кабул итү сәгать 8дә башлана. Шул вакыт арасында участок гомумтабиблары авырулар чакыруы буенча ике сәгатькә якын вакыт өй-ләргә баралар. Бер кабул итүгә якынча 15 минут вакыт куелган. Стоматологка – 30 минут. Ләкин бу соңгы регламент түгел әле, хә-зерге вакытта нәкъ менә бер кабул итүгә уртача күп-ме вакыт туры килгәнне ачыклау процессы бара.
Кыскасы, яңалык уңайлыклары һәм уңайсызлыклары белән тәмам гамәлгә кереп бетәчәк. Безгә аңа бары тик отышлы яраклашырга гына кала.
Рөстәм СӘМӘРХАНОВ, район үзәк дәваханәсе баш табибы:
- Бәян ителгән яңалык әле сынау этабын гына уза. Җитешсезлекләре дә, плюслары да бар. Яңа система бигрәк тә авылда яшәүчеләр өчен бик уңайлы түгел. Әйтик кабул итү төштән соң булса, аннан соң анализлар бирергә, ЭКГлар үтәргә туры килсә, ул аларны тапшырып өлгерә алмый. Бу очракта берничә кат килергә туры киләчәк. Икенче яктан, пациент, әгәр алдан язылса, кабул итүгә анда күрсәтелгән вакытка гына турылап килә, күпме вакыты янга кала. Әлеге система гамәлгә кергәч, халыкның иртәнге якта дәррәү поликлиникага чабуы гадәте бетәчәк. Тик мин киләчәктә беркүпме дәрәҗәдә табибка тере чират белән “эләгү” мөмкинлеге дә булыр дип уйлыйм. Чөнки кеше сәламәтлеге турында сүз барганда башкача булу мөмкин түгел.

Оценить материал и/или оставить мнение

БАРЛЫК ЯҢАЛЫКЛАРНЫ УКУ