Буа районының Кыят авылында спорт мәйданчыгы ачылды

2019 елның 12 июле, җомга

Бүген Буа муниципаль районының Кыят авылында тантаналы рәвештә спорт мәйданчыгы ачылды. Бу безнең районның авыл җирлекләрендә җиһазландырылган дүртенче спорт мәйданчыгы. Шундый ук спорт мәйданчыклары Иске Суыксу, Ырынгы, Адав-Толымбай авылларында да төзелде. Агымдагы елда Югары Лашчы авылында да төзелеш планлаштырыла. Ә инде бүген Буа шәһәренең Кленовая урамындагы ишегалдында тренажер мәйданчыгы ачылачак.

Муниципаль район башлыгы Марат Җәббаров авыл халкының шатлыгын уртаклашты. Ул мәйданчык беркайчан да буш тормасын, ә кыятлыларга район һәм республика ярышларында яңа спорт җиңүләре теләде.

Шуны да билгеләп үтәргә кирәк, әлеге торак пунктта бүгенге көндә 700 гә якын кеше яши, авыл мәктәбендә 120 укучы белем ала.