Буа районында Икътисад министрлыгы вәкилләре булды

2021 елның 1 апреле, пәнҗешәмбе

Икътисад министрлыгы вәкилләрен район башлыгы Ранис Камартдинов каршы алды. Күчмә визит кысаларында Татарстан Республикасы икътисад министры урынбасары Наталья Кондратова, муниципаль берәмлекләрне үстерү бүлеге башлыгы Эльвира Сәгыйтова, кече һәм урта эшмәкәрлек субъектларының стратегик үсеш бүлеге башлыгы Марина Чижикова составындагы делегация районның эре җитештерү объектларында булды. Аерым алганда, «Буа машина төзелеше заводы» ҖЧҖ, «Әхмәт электр механика заводы» ЯАҖ, «Зеленодольск сөт эшкәртү комбинаты» АҖенең Буа филиалы, «Буа» сәнәгать паркы, шулай ук «Карлинский» сәүдә йорты каралды. Сәфәрне йомгаклау өлеше район Башкарма комитетының утырышлар залында төгәлләнде.