2022 елга Буа урманчылыгының эшенә йомгаклар ясалды һәм агымдагы елга планнар турында фикер алыштылар
ТР урман хуҗалыгы министрының беренче урынбасары Илгизәр Зарипов эш визиты белән Буа муниципаль районында булды. Биредә “Буа урманчылыгы” ДКУ һәм “Буа урман хуҗалыгы” ДБУнең 2022 елдагы эш нәтиҗәләре һәм 2023 елга бурычлары турында” киңәшмә узды.
Утырышта муниципаль район башкарма комитеты җитәкчесе Ленар Шакирҗанов катнашты. Төп нотык белән җитәкче-урманчы Илнар Гатауллин чыгыш ясады. Ул, былтыр урманчылык территориясендә 51,5 гектар мәйданда урман торгызу эшләре, 250 гектарга агротехник тәрбия, 78 гектарга урман культуралары өстәү, 0,2 гектарга урман питомнигы базасында орлык чәчү эшләре башкарылуы турында сөйләде.
«Шулай ук 300 килограмм урман үсемлекләре орлыгы әзерләнде һәм 354 мең данә стандарт утырту материалы үстерелде. План 15%ка һәм 24%ка арттырылды», - диде Илнар Гатауллин.
Аның сүзләренә караганда, федераль дәүләт урман контролен (күзәтчелеген) гамәлгә ашыру кысаларында урманнарда 1262 патрульлек һәм 15 профилактик чара үткәрелгән.
Аннары докладлар белән урман хуҗалыгы директоры Сергей Кириллов һәм беренчел профсоюз оешмасы рәисе, урманны саклау һәм яклау инженеры Энҗе Мөдәрисова чыгыш ясады.
Киңәшмәгә йомгак ясап, министрның беренче урынбасары Илгизәр Зарипов белгечләргә урман янгыннары техникасын, урман янгыннарын сүндерү җайланмаларын һәм чараларын 2023 елгы янгын куркынычы сезонына әзерләү, урман янгыннары формированиеләрен булдыру һәм башкалар белән бәйле берничә йөкләмә бирде.
«Урманнарда янгын куркынычы сезонына әзерлек мәсьәләләренә аерым игътибар бирүегезне сорыйм, - дип ассызыклады Илгизәр Зарипов. - Бу язгы чорда корыган үләнне җыю буенча чикләүләрне һәм урманга якын җирләрне чүп-чардан, ауган агачлардан, кисү калдыкларыннан, җитештерү һәм куллану калдыкларыннан чистарту кирәклеген, йә аларның янгынга каршы минераллаштырылган полоса яки янгынга каршы башка киртә белән бүленүен аңлатуга кагыла».