Буа районы башлыгы юлларда исерек шоферлар турында: «Һәр хокук бозучы өчен җитәкче җавап бирәчәк!»
Буада юл хәрәкәте иминлеге буенча район комиссиясе утырышы узды, аны район башлыгы Ранис Камартдинов үткәрде. Районда ел башыннан хокук бозучыларны ачыклау һәм хокук бозуларны профилактикалау буенча эш җитди көчәйтелде: узган ел юлларда 9 кеше һәлак булды. Аеруча исерек шоферларны һәм рульгә хокуксыз утыручыларны ачыклау рейдлары активлаштырылды. Әйтик, ел башыннан Буа районы ЮХИДИ телеграмма-каналында катнашучылар саны өч тапкырга артты, анда юлларда исерекләр һәм башка хокук бозучылар турында хәбәр итәргә була - 300дән 900гә кадәр. Комиссия утырышына шулай ук хезмәткәрләре исерек килеш руль артында тоткарланган барлык предприятие һәм учреждение вәкилләрен дә чакырдылар.
«Бу юнәлештә хәзер ныклап эшләячәкбез. Һәр хезмәткәр өчен җитәкче дә җаваплы булачак! Авыл җирлекләре башлыкларына да эшне активлаштырырга кирәк. Бары тик уртак тырышлык белән генә бу проблеманы хәл итеп була. Мондый ”рульлеләрне” җаваплылыкка тартмыйча нәтиҗәгә ирешеп булмый!» - диде Ранис Камартдинов.
Районда шулай ук планнан тыш автомәктәпләр тикшерелде. Шулай итеп, фактта дәресләр һәм расписание туры килмәү фактлары ачыкланды.
«Әйдәгез, яңа гына машина йөртүче булганнарның белем сыйфатын күтәрү өстендә эшлик. Юл-транспорт һәлакәтенең нәтиҗәләре турында фильмнар күрсәтергә кирәк», - дип билгеләде Буа районы башлыгы.
Районда автомәктәпләр белән эшләү буенча беренче нәтиҗәләр инде сизелә. Буа ДОСААФы җитәкчесе хәбәр иткәнчә, узган ел белән чагыштырганда, автомәктәп курсантларының имтихан тапшыру күрсәткече арткан.
Аварияләрне профилактикалау пропаганда юнәлешендә дә алып барыла: районның хезмәт коллективларында, автомәктәпләрендә һәм кинозалларында юл хәрәкәте кагыйдәләрен бозу нәтиҗәләре турында фильмнар күрсәтелә.